الثلاثاء، 25 نوفمبر 2008

مرحبا بكم في مملكة إفريقيّة العربية الإسلامية

ظلمة



ما شفتو شي؟ ما عندكم ما تشوفو : هاذاكة هو حال الدغرارة الي عاملتهلنا شركة نقل تونس باش تقينا من شر الميترو الخفيف



الأحد، 23 نوفمبر 2008

!إفتحوا المعابر

الخميس، 20 نوفمبر 2008

البيرة، ديونيزوس و الدين الحق

جميعة لتالي خوكم أوبرمنش ؛ ماهو قلوقي ؛ بدا يفد مالإلحاد و نيتشه و الريق البارد. قلت برة نلوج فماش دين يملى العين خلي الواحد يبدل بيه الجو. لوّجت لوّجت شي، الدين على حسب مواصفاتي أنا ماهوش متوفر حاليا في الأسواق.

وانا مروح نلقى واحد لابس كشطة حبني نعنّق الإسلام والا شنوة، وبدا عاد يحكيلي على التوحيد والألعاب و كيفاش محمد اخر رسول و هو الصحيح (بالمعنى لوّل و الثاني متاع الكلمة)، واللي قبلو الكل يحشيو فيه وكان نتبعو يضمنلي واد بيرة و فوق السبعين زبور على ذمتي. برجولية عجبتني حكايتو و شرهت على هالدين ياخي خذيتو في وقتو و خلصت السيد بالحاضر .
و بعد المبروك و هاك اللوغة بعثني إل أقرب جامع باش ندخل في الدين على قاعدة صحيحة. وانا نمشي منتصب القامة مرفوع الهامة يعرضني النديم متاعي "عياش مالمرسى". حكيتلو لحكاية ياخي ما نرا كان في وجهو يصفار و يخضار ويقلي "عملت العار يا أوبرمنش عملت العار! ماللي كنت ملحد باش إتدّوّرها مسلم ضربة وحدة! ياخي ما فيبالكش في الإسلام محرمين البلعة و الجنس من أجل المتعة! ايا بدل الساعة بساعة اخرى و نمشيو نعملو بلعة وطنية وإلا حتى عالمية فماش ما تخطاك من هاللوغة البهيمية"
و في الحين شدينا الرحال لأقرب حانة وخذينا اربع من بنات الشعير. بعد شوية تحير علي الضمير و قلت "يا عياش برجولية خلي نمشي بركة نصلي حتى صلاة وحدة باش ما نقولش ضيعت فلوسي فالفارغ" تكرز عياش و قال "اش بيك مارق؟ هاي دبوزة مرناق تشيخك في مخك و تنسيك في ربك".
وكي حسيت روحي وصلت للنشوة القصوى سئلت عياش المرسى : "اشكونو رب البلعة؟" قلي : "ديونيزوس". فخررت ساجدا من الشيخة (موش الخشية) الديونيزوسية وقررت من وقتها باش نولي من خلفائه على الكورة الارضية.
كي روحت للدار، قعدت ندور في الحكاية في مخي (او بالاحرى مخي هو اللي كان يدور في الوقت اذاكا) و قلت ياخي كيفاش واحد يوعد لعباد بالبيرة في الاخرة و هو عمرو ما ذاقها في الدنيا : لحكاية فيها إنّ.
وبعد البحث و التمحيص و ماخذة التراخيص و صلت للنتيجة التالية : محمد كي كان صغير كان يموت عالبلعة بالسكات و الرياض و مايحبش الجوجمة و تكسير الراس، ياخي لقى مغارة إسمها حراء ولى يبلع فيها وحدو (ويحه اما سمع بهذا الحديث؟). و بماانو كان تاجر يمشي برشة لبلاد الشام فانو خالط برشة رهبان علموه كيفاش يصنع البيرة و الشراب وحدو في الغار متاعو، و زاد سمع اللي الجماعة اذوكم يستناو في واحد باش ينقذ العالم، ياخي روح لمكة و بدى يمشي يبلع و يتخيل في روحو هالمنقذ اللي يستناو فيه.
للي جا نهار بلع فيه بلعة لقضا و بدى يتخيل في واحد عندو جوانح يحكي معاه. بعد مدة تخيل روحو طلع لديونيزوس و حكى معاه و فرض عليه الصلاة 500 كعبة بيرة في النهار، و بدات وقتها المفاوضات حتاكش طاحت لخمسة كعبات برك.
وهو مروّح بين هوا و فضا خدم مخو و قال "كان يقعد مجال البلعة مفتوح لجميع المواطنين فإنو ذالك يمثل خطر كبير على الدين خاطر اي واحد ينجم يتخيل اللي تخيلتو و يولي يهز و ينفض وحدو" و إنطلاقا من هالملاحظة الصغيرة بدى يبدل في التعاليم الاصلية للدين و بدى يحرم في البيرة تدريجيا. و هوني نفهمو علاش حرّم الاسلام البيرة ووعد بيها في الاخرة كجزاء على التخلي عنها في الدنيا.
و توة خليوني نمشي نعطي حق ديونيزوس!


ملاحظة : بعض ماجاء في هذا المقال مستوحى من حكاية الشاعر الأعشى الواردة في كتاب "رسالة الغفران" لأبي العلاء المعري

السبت، 15 نوفمبر 2008

Petite pensée matinale : Allah et les pronoms impersonnels

On sait tous que l'Islam prétend que Allah ne peut pas être défini en genre : il est ni mâle ni femelle. D'autre part, les musulmans prétendent qu'Allah a choisi la langue arabe comme langue du Coran car celle-ci est une langue très développée et qui est la seule à pouvoir nous transmettre le message divin. Or, et comme la langue arabe ne possédait pas de pronoms impersonnels, Allah a toujours été désigné par "houwa" qui est la forme du masculin, ce qui est absurde vu notre thèse de départ. Le tout-puissant peut-il se permettre de négliger un détail aussi important en envoyant le plus infaillibles et le plus limpide de ses messages? N'aurait-Il pas du choisir une autre langue qui posséde des pronoms impersonnels, et Dieu sait (c'est-à-dire lui-même) comme elles sont nombreuses? à méditer...

الأحد، 9 نوفمبر 2008

خواطر ما بعد الدربي

اليوم تفرجت كيما برشه توانسة في دربي الكليب و الترجي : الماتش هايل ياسر و تسجلت فيه 4 اهداف كاملة اللعب كان جميل و متعة للناظرين، اما شنوة كالعادة عندي شوية ملاحظات حبيت نقولهم

1 اللغة اللي يحكي بيها المعلق و اللي لاجات لا عربية فصحى و لا دارجة : هاللوغة هاذي ما عندها حتى علاقة بلغة الجمهور الرياضي : عمركمش سمعتو واحد في الستاد يقول تماس والا تسلل؟ يظهرلي زودنالها شوي في حكاية سياسة التعريب. عندي صاحبي مرة قلي و احنا ماشين للستاد "أحسن مشروع تحلو في تونس هو قناة تنقل الماتشوات بالسبان و التربريب" انا ما قلتش المذيع لازمو يهبط يكفر في التلفزة اما عالاقل يحكي كيما يحكيو لعباد، موش يبدى حازق روحو و يطلع في لكلام بالسيف

2 الملاحظة الثانية تخص حمدي القصراوي القول متاع المكشخة واللي ماللي بدى يكور و هو عندو سيري متاع كلام زايد لازم ما يقولها كل ما يشد الكورة وبما انو الكامرا تعمل عليه قرو بلان و زيد تعاودها بالرالنتي فانو موش لازم نكونو خبراء في قراية الشفايف باش نعرفوه فاش يتمتم : يا سي حمدي راهو ما يخرجش عليك الشي هاذا، اساعة ماشي في بالي بيك تصلي و تخاف ربي؟

3 على ذكر الصلاة نحب نقول اللي اليوم في التلفزة وراو طفلة متحجبة قاعدة في فيراج الكليب (بدون تعليق)
نحب زادة نحكي عالغنايات اللي يغنيو فيها في الستاد و اللي تمثل حالة السكيزوفرينيا اللي يعيشها الشعب التونسي : ففي فيراج الترجي مثلا كي كانو خاسرين كان يغنيو بكل خشوع : "يا ربي يا عالي انصر ترجي" و بعد ما عدلت الترجي كلها هبطت تغني في "موش لازم التحليل و رانا موتى". على فكرة، مرة في الستاد وانا قاعد فيراج هبطو يغنيو في يا ربي يا عالي، يا خي تلفتلهم راجل كبير في العمر و قاللهم "جبتو الصيد من وذنو، ياخي ربي باش يهبط يكور؟ كان جا هكاكة راهي السعودية هزت كاس العالم من هاااااك العام" ههههه

4 فيراج الترجي شعلو فلامات في الميتون الثاني، و بغض النظر على الخطر الصافي متاع لفلام (صدقوني شديت وحدة في يدي و نعرف على شنوة نحكي) فانو الفلام تساوي ستة شهور في بوفردة لذلك ماذابيه الواحد يخمم مليح قبل ما يشعل

5 اخر ملاحظة تتعلق بدخلة الكليب في الميتون الثاني و اللي صورو فيها خريطة تونس فوقها شعار الكليب و كتيبة بالسوري معنتها " راهي متاعنا". يا جماعة راهي تونس متاعنا الكل و ماهيش متاع لكليب اكهو، راهو ما يجيش منو لكلام هاذا و قتلي الجماعة عاملين حوار و قاتلين رواحهم على خاطر تونس. عيب راهو عيب

قراءة نقدية لميثاق الشباب التونسي

توة بالضبط عويّم لتالي جات فكرة حوار الشباب، واللي ظهرتلي في الاول حكاية فارغة و باش تكون كيما الاستشارة الشبابية الموسعة متاع عام 1996. بعد مديدة تحل الفوروم المشهور و زدت تأكدت من صحة إحترازي : ممثلين عن دور الشباب و الشبيبة الدستورية يحكيو على إنجازات العهد الجديد و كل واحد ينعم على الاخر. لكن و بعد فترة معينة تحسن مستوى الحوار و ولى جدي أكثر و بدينا نقراو في مداخلات فيها ما يتسمع : في الوقت اذاكا تراجعت على موقفي السابق وقلت برة آش باش يصير كان دخلت و شاركت شوية لعل و عسى.. و بديت نشارك في بعض المحاور اللي تهمني شوية و تفاجئت باللي فمة برشة ناس مخاخها مسكرة ماركة إنتي تحكي على الهوية التونسية و هو يقلك إنتي عميل و عاشت العروبة و الإسلام و هات من هاك اللاوي، و إلا مرة واحد حل موضوع قلك فمة وحدة من عشرة بنات توانسة مستعدين يقومو بعلاقات جنسية قبل الزواج، و بدات عاد العريبة تندد بالإنحلال الأخلاقي و تقليد الغرب و كيفاش يلزمنا نحميو بنات الوطن من هالافة المحيطة بينا، و قال واحد وقتها مش معقول انو القانون يحمي الطفلة اللي زنات (؟؟) خزرت الفوق و نلقى إستفتاء و يا هول ما رأيت : 78% يقولو إللي العلاقات الجنسية محرمة و يجب توعية الشباب بذلك. مانخبيش عليكم الوقت اذاكا عفتو جد بو الحوار وخرجت منو وإكتفيت بزيارات تفقدية ساعة ساعة.. كي جا عاد7/11 و قالو باش يعلنو عالميثاق العظيم الحق شميتها قارصة.. و باش ما انطولش عليكم هاو نص الميثاق مرفق بتعاليقي مع العلم اني باش نفسخ بعض الكلمات و الاسماء اللي قالولي كوني تحيرلنا خونا عمار




ميثاق الشباب التونسي


بسم الله الرحمان الرحيم،

نحن الشباب، شبابَ تونس فتيانًا وفتياتٍ، من كلِّ جهات البلاد ومن الخارج ومن كافة الفئات وقطاعات النشاط الاقتصادي والاجتماعي والثقافي، ومن الأحزاب السياسية والمنظمات الوطنية والجمعيات وسائر مكوّنات المجتمع المدني،

"هل انو الشباب الكل كان ممثل في الحوار؟ مانظنّش.. تي نعرف شكون ماسمعش بيه جملة.. و هل أنو سائر المكونات متاع المجتمع المدني تمثل كل الشباب؟ لها الدرجة المجتمع المدني مؤثر في بلادنا و انا ما فيباليش؟"

تأسيسا على مبادرة سيادة الرئيس في الذكرى العشرين للتغيير المجيد،"شكونو مجيد؟" بإقرار سنة ثمانية وألفين سنةً للحوارِ الشامل مع الشباب، حوارٍ وطنّيٍ مفتوحٍ للجميع يؤكد الثوابت والمبادئ والقيم التي نبني عليها وعينا الجماعي، وننطلق منها إلى تكريس وجودنا الحضاري والوطني، ونرجع إليها في سلوكنا وحياتنا الاجتماعية، حوارٍ يبرز الرصيد المشترك للأجيال الناشئة من التونسيين والتونسيات ويسطر آفاق المستقبل أمامنا في ضوء طموحاتنا وتوجهاتنا الوطنية، حوارٍ نجدّد به العهد من أجل المساهمة الفاعلة في بناء تونس ونحتِ غدِها الأفضل،

بعد استكمال مسار هذا الحوار وفعالياته التي شملت كل مناطق البلاد ومختِلفِ الفضاءاتِ الشبابية المتاحة، واستخدمت كافة قنوات الاتصال ووسائطِه المكتوبِة والمسموعةِ والمرئيةِ والالكترونية والتراسلية،

"يكذبو : لا جاني لا إيمايل لا تليفون"

والمجتمعين في لقاء شبابي وطني حاشد بمدينة العلوم بتونس اليوم 11 أكتوبر 2008،

نعتبر شعارَ حوارِنا "تونس أوّلا" منطلقا لإدراكنا ووعينا بالثوابت والمبادئ والقيم والمراجع الوطنية:

- تونس أوّلا وفاءً للوطن ولتاريخنا وأمجادِ شعبنا القائمةِ شواهدُها منذ آلاف السنين،

"حلو"

- تونس أوّلا حبّا لهذه الأرض الطيّبة ووفاءً لأرواح شهدائها وتقديرا لعظمائها ومصلحيها وزعمائها الذين خلّد التاريخ ذكرُهم عبر العصور،

"حلو ياسر"

- تونس أوّلا ذودًا عن رايتها التي تبقى فوق كل راية، وإعلاءً لشأنها بين الأمم لتظلّ عزيزة منيعة أبد الدهر فهي مصدر نخوتنا وعزتنا لا تتحقّق إلا بعزّتها،

"لازم ما نعملو ميثاق باش نوليو وطنيين؟"

- تونس أوّلا اعترافا بالجميل لكلّ من ضحّى من أجل استقلالها وسيادتها وناضل من أجل إقامة دولتها المستقلّة وتقدمها وازدهارها،

- تونس أوّلا اعترافا بالجميل لبطل التحوّل وصانع التغيير، الذي زرع الأمل في النفوس واستنهض قوى البذل والعطاء في شعبنا وأحيا فيه أسباب الطموح فعادت الثقة وتحقّقت المكاسب وتراكمت الإنجازات والنجاحات،

- تونس أوّلا وفاء لرائد حاضرنا الأمينِ على مستقبلنا، قائدِنا وقُدوتِنا اليوم وغدا سيادة الرئيس ،

"ظاهرلي فهمنا مالجملة لاولى زايد العوادة"

فتونس أوّلا والشبابُ من أجلها أبدا لصنع الأمجاد،

ونعلن في ضوء هذه المعاني السامية:

- عزْمَنا على البذل والمثابرة بكل ما أوتينا من طاقات وكفاءات على درب البناء المتواصل لتونس الطموح، تحقيقا لرفعتها وارتقائها إلى مصاف الدول الأكثر تقدما،

"معناها ما كنتوش ناوين قبل ما تتفاهمو على الميثاق؟"

- تمسّكَنا بمقومات شخصيتنا الوطنيةِ بكلّ عمقها التاريخي والحضاري، مقوّماتٍ مراجعُها أصولُنا الوطنيةُ الثريةُ بأبعادها الإفريقيةِ والمتوسطيةِ وحضارتُنا العربيةُ الإسلاميةُ المجيدةُ "مرط مجيد؟" وإسهاماتُ بلادنا في الحضارة الإنسانية وإشعاعُها في محيطها عبر العصور،

"علاه التمجيد ما شمل كان البعد العربي الإسلامي؟ البربر ما عندهمش مجد؟ حقه، شبيني ماسمعتهاش كلمة بربر؟ ولا الحامة و الدويرات موش تابعين تونس؟"

- ذودنا بكلّ قوّة للحفاظ على خصائصنا التونسيةِ القائمةِ على الوسطية والاعتدالِ والانفتاحِ على محيطنا الإنساني، وحِرْصِ شعبِنا الدائِم على منطلق الحكمة والتفاهم بين البشر، والدفاعِ عن قضايا السلم والخير والتضامن والتآزر، ونبذِ التطرف والتعصب والإرهاب،

"اش تقصدو بكل قوة؟ ياخي ناوين على حرب أهلية؟"

- التزامَنا بمبادئ دولة القانون والمؤسسات في ضوء النظامِ الجمهوريِّ وضوابطه، النظام الجمهوريِّ الذي اختاره شعبُنا لنفسه وَوَثَّّقَهُ في دستوره، وبالمثابرة على صونه وصون ركائزه القائمةِ على الحرية والعدل واحترام حقوق الإنسان في بلد المساواة وحقوق المرأة والتضامن الفاعل،

"تناقض : إذا كان حكينا على المساواة معنتها للراجل نفس حقوق لمرا و فيس فرسا و عليه ما نقولوش حقوق المرأة و كانها حالة خاصة"

فتونس للجميع، والشبابُ كلُّه من أجل تونس،

ونجدّد العهد:

- على خدمة الوطن بكل صدق وإخلاص في كل الميادين ومجالات الحياة،

- على الاجتهاد والمغالبة من أجل رفع راية تونس عاليا في كل محافل العلم والمعرفة والإبداع والرياضةِ، وكلُّنَا عزمٌ على التألّق وتحقيقِ مزيد الانتصارات،

نجدّد العهد:

- لِنمارسَ مواطنَتنَا بكلّ وعي ونُضجٍ، فإرادةُ الشبابِ من إرادتِنا الوطنية،

- لنردّ الجميل لصاحب الجميل رائدنا الرئيس زين العابدين بن علي الذي بادر وأتاح حقَّ الانتخاب ابتداءً من سنِّ الثامنةَ عشرةَ وفَتَحَ أمامَنا كلَّ مجالات المشاركةِ في مؤسسات الجمهورية وفي العمل السياسي والنشاطِ المنظماتي والجمعياتي وفي الفعل الثقافيِّ والاجتماعي، فلْيكُنْ عملُنا بقدر هذا الأفق الكبير المفتوح أمام شباب تونس بكلّ فئاته ومكوّناته مهما كانت أوضاعُه أو احتياجَاتهُ الخصوصية،

"اش تقصدو برد الجميل؟ راهو عطاكم حق الانتخاب موش حق انتخابو هو؟"

وكما نتمسّك بهذه الحقوق ونواصل النضال من أجل مزيد إثرائها وترسيخها، نعلن التزَامَنَا الكاملَ والثابتَ بالاضطلاع بواجباتنا نحو تونس وشعبِنا وبمسؤولياتِنا في بناء مستقبل بلادنا وبالمشاركة النشيطة في الحياة العامة فننخرط أكثَر في العمل السياسي والمدني ونسهم أكثرَ في الجُهد التطوّعيِّ والتضامنيِّ النبيل، حتى يصبح الشباب جزءا فاعلا ومكونا أساسيِّا في مسيرتنا الوطنية،

"الانخراط في العمل السياسي أو الجمعياتي يلزم يكون نابع من رغبة الفرد و حتى حد ما عندو الحق باش يفرض علي أي حاجة بما في ذلك ممارسة حقوقي"

ونؤكد بهذا الميثاق عمقَ حرصِنا على تكريس قيم الحداثة وفكرها وبناء مجتمع المعرفة، والاندراجِ الناجعِ والناجحِ في عصر اقتصاد المعرفة والذكاءِ بالتمكن من أكثرِ التكنولوجيات تقدما وبتنمية كلّ طاقاتنا وقدراتنا الإبداعية من أجل تحقيق هذه الأهداف الحضارية الراقية،

ونجدّد العهد على أن يكون حرصنا على كلّ ذلك بقدر حرصنا على السّلوك الحضاري بما يحمله هذا المفهوم من قيم نبيلة واحترامٍ للغير ولحرية الرأي والمعتقد وتقديرٍٍ للتعدّدية وانفتاحٍ على الاختلاف وتمسّكٍ بأخلاقيات الحوار وبمبادئ الديمقراطية وثقافاتها وممارساتها،

"بلا بلا بلا بلا، مادام عمار خدام اللي تحكيو فيه ما عندو حتى معنى"

ونؤكّد وعينا بجسامة التحدّيات القائمة وفي مقدمتها تحدّي التشغيل الذي جعل منه سيادة الرئيس أولوية مطلقة، ونجدّد عزمنا على الإسهام بروح عالية من الوطنية والمبادرة والإقدام في إنجاح السياسات والبرامج الرامية إلى رفع كل التحديات القائمة وكسب الرهانات الناجمة عنها،

"بالله واحد يفهمني كيفاش؟ ياخي احنا هوما اللي نخلقو في مواطن الشغل؟ ياخي احنا هوما اللي ما نحبوش نعطيو القروض للشباب و نخليوها لاصحاب الاكتاف بدل اصحاب الشهادات؟"

ونعلن التزامنا بتفعيل مبادئ هذا الميثاق وتوجهاته وحِرْصَنَا على مواصلة الحوار وتمسّكَنَا بحقنا في التعبير عن آرائنا وطموحاتنا في ضوء قيمنا الوطنية وأخلاقياتنا وفي ظلّ هذا المناخ القائم على الحريّة وتشجيع المبادرة والاجتهاد بقيادة الرئيس رائدِنَا أبدا وقائدِنا،

"و في ظل الرعاية الموصولة لحامي حمى الشبكة العنكبوتية السيد عمار الصنصار حفظه الله و ابقاه"

عاشت تونس حرّة منيعة أبد الدهر

عاشت الجمهورية

عاش الرئيس

تونس في 7 نوفمبر 2008


بعد قراءة هذه الرائعة الأدبية و اللي تمثل مرجع لكل دارسي اللغة الخشبية نحب نسئل سؤال يا حبذا كان تجابو عليه في التعليقات : اش شنوة زادنا هالميثاق و اشنوة فايدتو في الواقع : لخوانجي باش يبطل مالتخونيج؟ البطال باش يلقى خدمة؟ باش يولي الشباب يساهم في الحياة السياسية؟ باب التعليق مفتوح للجميع حتى للانونيم

ب س : كان ما يصنصرنيش عمار من هنا لغدوة يولي عندي بالرسمي أمل في تونس الغد

السبت، 8 نوفمبر 2008

الإرتقاء

I'm born again
with snake's eyes
Becoming
Godsize

PANTERA
-Becoming-

لقد ولدت من جديد
بعيني أفعوان
إرتقيت لأستحيل
في مكانة الإله

الخميس، 6 نوفمبر 2008

إستجابة لرغبة قرّاء المدونة : امال المثلوثي في "كلمتي حرة"

!بالله كي تحبو تهزو القفة هزوها مليح

اليوم نتفرج في اخبار الثمنية في قناة تونس سبعة، لفت إنتباهي ريبورتاج على القنطرة الجديدة متاع رادس حلق الواد : صحافيين و مسؤولين مصريين جاو يتفقدو فيها شادة روحها مليح والا لا، ماهو معلوم كونو فمة مهندسين مصاروة ساهمو في هالمشروع العظيم، و كينو مهندسينا احنا عندهم حوايج ما أهم لاهين بيها.
تي لا علينا
هاو انا بصيفتي مستعمل يومي لخط التحميم لاحظت هالايامات لخرة حركة غير عادية في شانطي القنطرة الأعجوبة، إللي ولى في ليلة و ضحاها نظيف يعمل 666 كيف، و قعدت ماني فاهم شي حتاكش اللي شفت الريبورتاج وفهمت انو اسباب الخوضة هي أسباب تقويدية بحتة
و بما انو جا الذكر عالقوادة، واللي هو موضوع البوست، فمة صحفية مصرية مالناس اللي استجوبوهم قامت تذكر و تعدد في محاسن و مزايا القنطرة الجديدة وقالت في جملة ما قالت "القنطرة هذي باش يكونلها تاثير إيجابي على الشباب التونسي، وبلا بلا بلا بلا " (ترجمة اوبرمنشية عن اللوغة المصرية بتصرف)
توة اش ما دخل قنطرة في مستقبل شباب تونس؟ توة زعمة البطالة باش تنقص بسبب القنطرة؟ باش نحلو مشكلة السكن الجامعي بحياة راس القنطرة؟ الشباب باش يبعد على خطر زحف الرمال على خاطر القنطرة؟ تي يزيو بلا هزان و نفضان!
فمة عشرين الف طريقة كنا نجمو نشكرو بيها هالمشروع العظيم : نقولو مثلا كونو باش تولي فمة سيولة في حركة المرور، ربح كبير للوقت في نقل البضائع، تي قولو حتى "منظرها حلو و طلعت على البحيرة" على كل حال انا متأكد انو فمة خبراء في اللغة الخشبية ينجمو يفيدونا باقتراحات بناءة مذللة بعبارات الشكر و الإمتنان و الإعتراف بالجميل إلخ إلخ إلخ
توة نعرف لمرا جاتنا ضيفة و موش مليح نهبط انبر عليها بالطريقة هذي، اما برجولية إللي يحب يهز قفة يهزها مليح

!ها نندبهم عالبهامة

اليوم خرجت إشاعة في منطقة تونس الكبرى مفادها أنو الستيغ، و بمناسبة ذكرى التحول المبارك، قررت باش تخلص المبروك عالمواطنين و تعفيهم من دفع معاليم الإستهلاك
و بما أنو التونسي يموت عالبلوشي، هدّت جحافل المواطنين على الإدارات الجهوية متاع دار الضو على أمل توفير شوية مصروف لشراء الخروف.
و النتيجة :
ضرب بونية امام ستيغ باردو، إنقطاع حركة المرور أمام ستيغ منوبة إلخ
و بالطبيعة ما نقصو لحد حتى دنوس
إللي يعجبك في الحكاية كونو برشة ناس روحت مغششة و ماخذة في خاطرها مالستيغ قال شنوة ما فرحوش بينا
توة بالله إشاعة كيف هذي على شكون تجد؟ ياخي هاذاكة حد نيتهم؟ توة الستيغ إللي تستنى بالدقيقة و الدرج في النهار اللي تزيد فيه في كيلو التريسيتي، تقوم تفرق في الضو بلاش؟ توة معقول هذا؟ نهبط نندبهم توة؟

الثلاثاء، 4 نوفمبر 2008

إهداء إلى عمّار بمناسبة ذكرى الرابع من نوفمبر

لغناية هذي حلوة ياسر و تعبر على الحالة النفسية اللي يعيشوها المدونين هالأيامات و إسمها "كلمتي حرة" : كلمات رائعة و أداء متميز للفنانة الحرة أمال المثلوثي

إستفتاء : ماهي أحسن جعة تباع في البلاد التّونسيّة؟

بمناسبة إنطلاق تسويق القولدن براو في تونس، و نظرا لتعدّد الإختيارات أمام المستهلك التونسي، فإنو صار من المهم باش نعرفو اشنوة توجّهات المواطن : هل أنّو سيواصل دعم المنتوج الوطني من خلال الإدمان على السلتيا؟ أم أنو باش يساند العولمة و تحرير الأسواق و يدز على القولدن براو؟ أم أنو باش يجبد بالناس الكل و يولي من مستهلكي اللوفن براو؟
ماذابينا نعرفو رايكم في الموضوع هذا بكل صراحة و موضوعية لأنو موضوع حساس للغاية و باش يحدّد مستقبل الإقتصاد الوطني.