The Overman

عمّار... من طينة أخرى

2010-02-15T20:26:00.005+01:00

اكا النهار و انا نحوس في نهج الدباغين، لفت انتباهي كتاب يطل حاشم بين كتاب احكام الوضوء و كتاب من مجموعة "هارلوكان"، كتاب كبير فيه قرابة 500 صفحة الي و ما يظهرش عليه القدم كيما الكتب لخرين... عنوانو : « Problèmes de notre temps » و الكاتب متاعو اسمو "سليّم عمّار"... الاسم هذا الحق أول مرة نسمع بيه... دورت الكتاب من تالي بش نعرف أكثر على الكاتب، نلقى الفقرة هذي :

Le professeur Sleïm Ammar n’est pas seulement un médecin, un grand médecin. Il est aussi un érudit, un philosophe, un historien, un poète. Il est (… comme ses valeureux ancêtres) lui aussi un encyclopédique, parcouru par des cultures variées et ouvert à tous les courants du monde. (Professeur Jean Bernard, de l’Académie Française)

سئلت مولى النصبة على السوم، خمم خمم و قالّي : "... دينار !"
"دينار ؟! مثبت ؟؟"
"أي أي... دينار فيه البركة... تي عندي قداه ننصب بيه و حد ما هزو... آه حقة !! كان تحب عندي اخرين كيفو..."
و جبد من كرذونة 3 كتب اخرين لنفس الكاتب، كل واحد أكبر مالاخر...
"قداه اذومة معلم ؟؟"
"الكل كيف كيف ولدي... بدينار اكهو !!"
...
...
هزيت الكتب و خلصت الراجل : اربعة كتب ما يجيوش حق كتاب أصفر !!
الحاصيلو، روحت للدار و قعدت نطلع على الكتب الي شريتهم... شدتني قصيدة كتبها بعد بعشرة ايام تقريبا من التحول، القصيدة بعنوان La débourguibisation، و تورينا رؤية المثقف هذا للوضع السياسي و الاجتماعي للبلاد في الوقت هذاكة... أما الي يغيض اكثر من كون الكتاب يتباع بدنوس، هو انو الشي الي نقدو عمار ما زال موجود لتوة...
من غير ما نطول عليكم، هاو نص القصيدة كامل و انتوما احكمو وحدكم :

La débourguibisation

Il nous faut bien une débourguibisation

Pour donner à tous dignité et notion

De ce que la liberté responsable veut dire

Pour servir le pays et le reconstruire

Elle signifie que soit à jamais révolus

Le culte des personnes et tous les grands saluts

Que nous rendions au chef et milles autres courbettes

Que nous faisions aussi depuis belle lurette

Et qui altéraient le / sens de la dignité

Entravant pour longtemps toutes nos libertés

Quelles que soient son ampleur, sa relativité

Elle découle à l’instant de la nécessité

Car on aura beau dire, c’est là une évidence

Que ne peuvent cacher nos crises de consciences

Elle découle de source en raison du gâchis

Des heurts et des excès, voir de l’anarchie

Qu’un pouvoir personnel basé sur les dictats

A fini par créer au sommet de l’Etat

Mais aussi et au sein / de toute la nation

Et dans bien de rouages / de nos institutions :

Ce qui avait fini par infantiliser

Le peuple tunisien et ridiculiser

Les joueurs de « bendir » trop zélés, trop voyants

Qui chantaient des louanges du Grand Chef tous les ans

Et qui n’étaient pour lui que de simples carpettes

Pour s’essuyer les pieds, tout au long de ses fêtes

C’est donc en une dé-bourguibisation

Que le salut réside pour toute la nation

C’est bien en elle que / réside le salut,

Que notre capital aura sa plus-value

Ce capital est fait de nos forces vives

Trop longtemps retenues, de façon maladives

Lesquelles ne demandent qu’à mieux se libérer

Dans l’ordre et la mesure pour mieux coopérer

Il nous faut don bien savoir débourguibiser,

Malgré qu’en la matière, ce ne soit pas aisé.

Or il le faut sans doute et avec éclectisme

Pour effacer les torts de tout ce « bourguibisme »

Et n’en laisser que ce / qui aura pu servir

Ou servira encore, peut-être, à l’avenir.

Cela suppose que / soit gardé le souci

De l’ordre du travail, de la justice aussi.

Et du sens de l’état, et de la hiérarchie

Et pour ne pas sombrer / vite dans l’anarchie

Car nous avons besoin, pour nous épanouir

D’un élan mesuré afin de garantir

Un meilleur avenir à toute la jeunesse

Qui porte en elle l’espoir d’une nation en liesse.

Sachons donc opérer en cette ère nouvelle

Le tournant décisif pour une vie plus belle !

تونس و الجزائر و المغرب ثلاثة بلدان

2010-01-21T00:29:00.006+01:00

كفانا يا اخي (و يا اختي زادة) كفانا !! يزيونا مالريق البارد !! موش على خاطر زوز ماتشوات كورة بش نوليو دولة وحدة !! كان غدوة تلعب تونس و دزاير و الا تونس و المغرب توة نشوفو "أبناء البلد ا لواحد" اش يوصلو يعملو في بعضهم !

كان تحب تنضم لصفحة الفايسبوك اطمز لهنا

أقوى نكتة في 2009

2009-12-27T12:59:00.000+01:00

يا عمار يا وخي.. هز الحجب شوي..

2009-07-07T18:25:00.006+01:00

آه يا عمار راك قهرتني... صحة لامك كنت لاهي الجمعة الكلها.. اما ما تفرحش برشة.. ماشي في بالك الحكاية بش تقعد جمعة و من بعد تبرد ؟ دويوْ !! الحملة بش تتواصل العام كامل.. حتاكشي تفهم روحك و تجيبها برجلة... سينون هانا قاعدينلك كالشوكة في حلقك.. ماشي في بالك كي تصنصر مدونة و الا اثنين عملت حاجة كبيرة ؟ اتفرج في الفايسبوك كيفاش شنع !! اما زايد.. الطحان يبقى حياتو كاملة طحان..

يا عمار... برجولية كثرت على ما وصاوك !! توة كي تحجب مواقع البرني نفهمك، نقولو الانترنيت مخلطة و برشة صغار.. كي تصنصر مواقع الارهاب و الريق البارد مشات معاك.. اما هذي حكاية تصنصير مدونات و مواقع متاع ضحك و تفدليك ما جات شي راو (مثال ديزونسيكلوبيدي في نسختها العربية محجوبة في تونس)... يا دين السما حتى الضحك تحب تحرمو علينا؟ تي جيبها برجلة و رجعلنا موقع و الا اثنين !! توة اليوتيوب و الدايلي موشن قلقوك ؟ اه فيهم فيديوات موش باهين ؟ اعلاه ما تنصنصرهمش هوما و تخلي الكازي محلول ؟ تي هاك طلعت خبير في الحجب الانتقائي، بش تصعب عليك هذي ؟ يا سيدي اش تحب مالاخر ؟ تحبنا نقففو و نهزو شوية طحين ؟ هذاكة الي بيك ؟ توة نعمل لخويا تدوينة قزوردية مرة في العام... اكثرشي من هكة ؟ اما نعرف الي زايد.. و ماكش بش تحلهم اليوتيوب و الدايليموشن على الاقل في المستقبل القريب (زعمة زعمة عزة نفسي ما بتسمحلي... شوف اكا النفس العزيزة الغالية..) اما كيما يقولوها : هاني حاطك في مخي للماكسيمو... و ان عدتم عدنا... كلمة الختام للمدون المصري كريم عامر : "الى كل اعداء الحرية من رموز البغي و الجور و الظلم و التسلط... ستزدحم بكم مزبلة التاريخ و لن تترحم عليكم الاجيال القادمة و لتعلموا ان الغد لنا. فأيامكم قد غدت معدودة و ليلكم شرف على الزوال و فجرنا قد اشرف على البزوغ و الغد لنا"

وين ماشين ؟؟؟؟؟؟؟

2009-06-15T19:35:00.003+01:00

توة تقريب جمعتين لتالي، تفاجئت كي قريت التدوينة هذي متاع الزبراط، و الي يتحدث فيها على مجموعة على الفايسبوك أخذت من كرة القدم التونسية مطية لنشر ثقافة عنصرية و غرس النعرات القبلية بين ابناء الوطن الواحد. لكن مما زاد اثار اشمئزازي هو وجود مجموعات اخرى ماعندها حتى علاقة بالكورة قاعدة تنشر في افكار لا يمكن وصفها الا بالعنصرية المقرفة!!

تنجمو تشوفو مثال لهنا لمجموعة تطالب بأن تكون ولاية بنزرت "بالفيزا" وذلك للحد من الهجرة الغير شرعية ل... مواطنين توانسة كيفهم !!

كيف كيف لهنا مثال اخر و هو حزب اليمين المتطرف ال... طبلبي، والي ينادي بوقف الاستيطان الي واقفة وراه جهات خطيرة كيما ال ك*جي*بي (كاف، جندوبة و باجة)

انا مافهمتش هالناس هذي تحكي بجدها و الا تفدلك ؟ على خاطر كان تفدلك فنعلمهم انو تفدليك ماسط لاسط و ينجم يوصل لنتايج لا تحمد عقباها... و كانهم يحكيو بجدهم... وقتها يا خيبة المسعى !!

مرة في الستاد عباد تزايد على بعضها في شنوة العقاب الي محضرو لاختو في حالة تعرس بواحد ساحلي... واحد يقول نضربها لاخر يقول نطيحلها فمها، لاخر يقول نقتلها... معنتها بهامة اثنين في واحد : منها يسمح لروحو باش يتدخل في مستقبل اختو، و منها يزيد عليها بهامة متاع عنصرية غبية...

اكا النهار ركبت مع تاكسيست في العقد الرابع من عمره، قعد يحكيلي كيفاش طلع معاه مره واحد اصيل الساحل، ياخي كي فاق بيه من لهجتو تعارك هو وياه و مبعد هبطو !! اي نعم طردو مالكرهبة على خاطرو ساحلي !!! والراجل يحكيلي فيها على اساس عمل بطولي يستحق كل التشجيع !!

حبيت نسوق المثالين هذوما باش نوري الي الحكاية فاتت حدود الفذلكة و المنافسة الرياضية و ولات تهدد الوحدة الوطنية. في الاخير نخليكم مع صورة لاحد النتائج الممكنة لاختبار في فايسبوك يحددلك من انا بلاصة في تونس انتي، و قولولي اش قولكم ؟

ماذا يحدث في إيران ؟

2009-06-14T19:23:00.006+01:00

شكون كان يتصور الي احمدي نجاد بش يفوز فالدور الاول ؟ حتى حد !! جميع المحللين و المراقبين كانو يستناو في دور ثاني حاسم. لكن الي حدث كان عكس التوقعات، فكانت ولاية ثانية عوض دور ثاني. و كأنما كتب على دول العالم الثالث ان لا تعيش ديمقراطية حقيقية...

62.6% كانت النسبة الي نجح بيها احمدي نجاد، و هو ما خلى برشة ناس تشكك في نزاهة العملية الانتخابية، و اولهم المرشح مير حسين موسوي، و الي طالب بالغاء نتائج الانتخابات، كما شجع مؤيديه على الاحتجاج السلمي.

نعرف الي برشة بش يقولو نفس الحجة الي استعملها نجاد في المؤتمر الصحفي اليوم الصباح، و هي انو الخاسر ديما يلعب دور الضحية و يبدى يلوج على تبريرات على خسارتو. لكن اي متتبع للشأن الايراني يلاحظ بسهولة انو الدعوى بتزوير الانتخابات عندها هي زادة مبرراتها.

اكثر حاجة ظاهرة للعيان هي طريقة الانتخاب في حد ذاتها، و الي تتمثل في كتابة اسم المترشح على ورقة الانتخاب. و في حالة الي يكون فيها الناخب امّي، يقوم واحد من الحرس الثوري الموجودين في مركز الانتخاب بالعملية في بقعتو. و وقتلي نعرفو الي نسبة الامية في ايران حوالي 20% و الي الحرس الثوري يخدم تحت امرة المرشد الاعلى للثورة الاسلامية (الي عبر، ولو بصفة غير مباشرة، عن مساندتو لنجاد)، نفهمو الي امكانية التزوير ماهيش مستبعدة بالكل.

اضف الى ذلك انو في ايران ما فماش قوائم انتخابية : مجرد مضمون ولادة يعطيك الحق في الانتخاب. و بالتالي امكانية الانتخاب اكثر من مرة في اكثر من مكتب ممكنة.

من ناحية اخرى، تنتظر لجنة الانتخابات في العادة ثلاثة ايام قبل ما تمرر النتائج للمرشد الاعلى باش يصادق عليها. لكن الي صار في الانتخابات هذي انو السيد خامنئي وافق على النتائج فور صدورها، و هو ما يثير اكثر من سؤال حول مصداقية هذه النتائج.

هالتجاوزات الواضحة خلات مناصري موسوي يخرجو في مظاهرات عارمة ينددو فيها بنتائج الانتخابات، و بداو ينظمو في رواحهم عن طريق شبكة الانترنات، و هو ما خلى عمار الايراني يقصف مجموعة لا بأس بها من المواقع، و على رأسها موقع "تويتر". من ناحية اخرى، قامت السلطة بقطع خدمة الارساليات القصيرة في مرحلة اولى، ثم قطعت شبكة المحمول الاولى في ايران (والي تتحكم فيها الدولة) وما رجعوها كان اليوم الصباح.

الامر الجدير بالملاحظة في ايران، هي كونو كل ما يتعلق الامر بالاصلاح تاكل بعضها في البلاد، كيفما صار في المظاهرات الطلابية الي صارت سنة 1999 اثر صنصرة جريدة "سلام" ذات الاراء الاصلاحية. و الشي هذا يتفهم، على خاطر بعض الاصلاحيين يسعاو وراء الاطاحة بنظام ولاية الفقيه، و الي هو اساس الحكم الثيوقراطي في ايران. و بما انو 60% مالايرانيين عمرهم اقل من 28 عام، و بما انو كذلك ثلثي مرتادي الجامعات من النساء، انجمو نفهمو ان برنامج موسوي الاصلاحي هدفه بالاساس هو التعبئة الانتخابية ، لأنو السيد هذا كان في الماضي مالناس الي طالبت بقيام الحكم الديني و عمدت الى ارسائه.

و لهنا نفهمو تخوف النظام الايراني من المظاهرات الي قاعدة تصير هالنهارين، و الاشتباكات الي قاعدة تصير بين عناصر الامن و المتظاهرين.

شخصيا يظهرلي انو يجب ربط الاحداث هذي بإلِّي قاعد يصير في العالم من عشرين سنة لتالي، بمعنى رغبة الشعوب الي تعيش في انظمة قمعية في الانعتاق : هالشعوب الي عانت طويلا من جراء التقوقع و الانغلاق على جميع المستويات (الاقتصادي و السياسي و خاصة الفكري والثقافي).

و السؤال الذي يطرح نفسه في الوقت الحالي بالنسبة لي هو : هل ستصل رياح التغيير هذه الى البلدان العربية، على الاقل في مستوى التوجه الشعبي ؟

بالنسبة للصورة الثالثة : شاب ايراني يحمل ورقة مكتوب عليها : "كتبنا موسوي فقرؤوها نجاد"

حكايات الزمن المعفط

2009-06-10T15:36:00.004+01:00

كيف كنت في الليسي كانت من عاداتنا في اخر السنة الدراسية انو نتلمو في القسم و نبداو نغنيو و نعملو شوية تصاور للذكرى..

وكنت في تلك السنة جبت معاي ڨيتارتي بش نزيدو نحفلو الجو..

انا بديت نعزف في المقاطع الاولى من الاغنية و ما نرى كان في وحدة من بنات كلاسي متحجبة جاية تجري و عليها علامات الفزع.. كي وصلت بحذايا بدات تحكي و تلهّج : "من فضلك.. احترم نفسك.. خبي العود متاعك.. يزي مالعزف.. ما في بالكش حرام؟!"

... ... ...

لحظة سكوت تتبعها قهقهات متعالية لاصدقائي...

قلتلها : "من فضلك انتي احترم نفسك... ظاهرلي ما عملتش حاجة تخالف القانون.. وكان يظهرلك العكس هاوينو الباب في اخر الكولوار عهدي بيهم غادي فين يتقبلو الشكايات... و على فكرة الالة هذي اسمها ڨيتارة موش عود.."

جاوبتني : "واش مدخل القانون ؟ ربي و الرسول قالو حرام معناها حرام !"

قلتلها : "ما فيبالكش الي داوود كان بيتهوڢن زمانو و كان عازف من طراز رفيع ؟"

هي : "استغفر الله... استغفر الله... كيفاش تفتري على نبي الله الكذب ؟ و كيفاش ما تقولش صلى الله عليه و سلم ؟"

انا فمة حاجة ياسر اتطيرهالي : الصلاة عالانبياء...

و كنت ديما في حصص التاريخ كي نقراو على تاريخ الاسلام تثور ثائرتي كي الاستاذ(ة) تقول صلى الله عليه و سلم بعد ذكر اسم "محمد" (وهذا قبل حتى اعلاني الالحاد)..

و كنت ديما ندخل في نقاشات مع الاستاذ(ة) نقول فيها انو من باب الامانة العلمية انو نتجردو من توجهاتنا الفكرية و ما نخليوهاش تأثر على المنهج العلمي (كنت كي غير قريت كتاب "في الشعر الجاهلي" لطه حسين" و مازلت متأثر بالعقلانية و التخمام الرزين متاع عميد الادب العربي..)

الحق النقاشات هذي كانت مثرية جدا و علمتني اداب الحوار و مقارعة الحجة بالحجة.. اذ انو في اغلب الاحيان النقاشات من النوع هذا توفى بطردي من القسم او تهديدي بصفر في الشفاهي... و في افضل الحالات يقلي الاستاذ " برى بدل الساعة بساعة اخرى".. وهي شفرة معروفة في معهدنا و تعني "يا سيد راك نفختهملي برة دز دورة و اعمل قهيوة و نمي قدراتك الحسابية من خلال طريح بيلوت.. و هاني بش نسترجل معاك و مانيش بش نقيدك مطرود في الدفتر"

نرجعو لعلالشنا... خلينا بنت كلاسي تلوم علي كيفاش ما نصليش على داوود... ما نجمتش نشد روحي و قلتلها : " تي انا ما صليتش لربي خلي عاد على داوود..."

عاودت سيبتلي سيري جديدة متاع "استغفر الله" و مبعد قالت : "احترم نفسك ! شنوة هالاستهزاء بالمعتقدات؟ تضحك؟ اتوة اتوة تشوف مبعد اش يصير فيك!!"

انا حاشاكم عندي مرض مزمن ما عندوش دواء : وسع البال... ومن اهم اعراض المرض هذا انو يخليك تحكي برشة و ما تبطلش النقاش حتى مع العباد الي ما تفهمكش، و نعرفو كلنا الي هذا يمثل خطر كبير على الانسان ينجم يوصل حتى لتنقيص الاعمار !!

استسلمت لامري و قعدت نفسرلها الي المقدس عند ناس ينجم يكون مدنس عند ناس اخرى و الي القيم تختلف من شخص لاخر... ما حبتش تفهم... قالتلك لا معناها لا... لا سبيل اليه... تنجم تكون مختلف معايا اما لازمك تحترمني... و الاحترام معناها انو ما تغنيش و ما تشطحش في حضرتي !!

قلتلها بكل صحة رقعة : "مالا عالفازة هاني بش نغني و نشطح و نعزف مالفوق و كان موش عاجبك قدم مطلب هجرة بحذى ال سعود متأكد الي غادي باش تلقى شكون يعطيك مكانتك الي تستحقها حسب سنة الله و رسوله"

ورجعت لڨيتارتي و جوّي و عدينا لحظات لا تنسى، وخليتها هي تموت بالغزول... للي فالاخر استسلمت و خرجت مالقاعة و هي تتمتم "استغفر الله... استغفر الله... استغفر الله....."

شكونو الي ناقص عقل ؟

2009-05-25T23:46:00.003+01:00

اليوم ماكلة بعضها في البلوغوسفير على حكاية ناقصات عقل و دين : ناس تقول ما فماش فرق بين الراجل و المرا فيما يخص ملكة التفكير، و ناس تقول الي مخ الراجل و مخ المرا مختلفين على بعضهم في التركيبة، و بما انو النسا عندهم اقل خلايا في مخاخهم، فانو عقلهم بش يكون بالضرورة ناقص.

من خلال التدوينة هذي، نحب نبين انو النقاش في الموضوع هذا نقاش عبثي باتم معنى الكلمة، لانو موطن العقل في القرآن ماهوش المخ !!

تقلي كيفاش ؟ هاو جايك لحديث...

ورد في القرآن الايات التاليه

<<وَلَقَدْ ذَرَأْنَا لِجَهَنَّمَ كَثِيراً مِنَ الْجِنِّ وَالْأِنْسِ لَهُمْ قُلُوبٌ لا يَفْقَهُونَ بِهَا>>

<<"أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لا تَعْمَى الْأَبْصَارُ وَلَكِنْ تَعْمَى الْقُلُوبُ الَّتِي فِي الصُّدُورِ">>

اذا من الواضح ان موطن العقل في الاسلام هو القلب و ليس الدماغ!!!

مانيش بش ناقف عند تعارض القول هذا مع العلم الحديث، و بش نفترض جدلا انو العقل موجود في القلب.

يعني انو الي يجي يقلك النساء ناقصات عقل، "نورمالمون" يقصد الي النسا، حاشهم، عندهم حاجة ما هياش في قلوبهم ! لكن الواقع عكس ذلك، بمعنى انو المدافع عن هذا الحديث يولي يجبد في البحوث العلمية المتعلقة بالفرق بين دماغ الرجل و دماغ المرأة (يعطيه ياوالله بدماغ على راسو )

توة بجاه ربي هذا منطق !!! زعمة موش الرجال هوما الي ناقصين عقل، بما انو السيد الي عمل الدراسة هذي راجل، و زيد فرحان بيها و عامل فيديو عالفايسبوك ؟

ملخصهُ، الناس هذومة مستعدين بش يخفيو بعض جوانب الاسلام بدعوى الدفاع عن جوانب اخرى، وهو ما يدفعنا الى التساؤل عن مدى مصداقيتهم.

صدق بن كريشان اذ قال : "استيقظوا.. انهم يكذبون عليكم !!" ضُحكة الختام :

قال علي ابن أبي طالب:" إن العقل في القلب، والرحمة في الكبد، والرأفة في الطحال، والنَّفس في الرئة"

هل يمتلك الله الانسان ؟

2009-05-24T22:44:00.009+01:00

هل يمتلك الله الانسان ؟ سيبدو لكم كلامي غريبا بعض الشيء، لكنه في الحقيقة لا يقل غرابة عن القول بان الله يملك الانسان.

ان الملكية حق من الحقوق. و الحقوق جاءت لتنظم العلاقات بين افراد ينتمون الى مجموعات. و بالتالي فالحديث عن حقوق يتمتع بها الاله يعني واحدة من الفرضيتين التاليتين :

الاولى هي ان الاله و الانسان ينتميان الى مجموعة واحدة اي متساويان في المنزلة و لذلك وجب علينا تقنين المعاملات بين الطرفين بتحديد حقوق و واجبات كل منهما، فيسقط القول بتقدس الاله و سموه عن الانسان

اما الفرضية الثانية فهي انه لا يوجد اله واحد بل الهة عديدة، فوجب اعطاء الله الاسلامي (او المسيحي، اليهودي... حسب السياق) حقوقا تميزه عن بقية الالهة.. و بالتالي يسقط القول بوحدانية الاله، و التي هي جوهر ديانات التوحيد.

و هكذا يتبين لنا ان فكرة ملكية الاله للانسان تسقط بكل سهولة الاسس التي بنيت عليها جميع عقائد التوحيد.

لكنني لن اتوقف عند هذا الحد، بل ساغوص اكثر في معنى الملكية.

ان هذا الحق الملكية بصفة عامة تنتج عنه منفعة، سواء كان ذلك بالاستعمال او الاستغلال او التصرف في المملوك. فلنفترض جدلا ان الله يتمتع، بطريقة ما او باخرى، بحق الملكية .فبمذا اذا ينتفع الله عندما يمتلك الانسان ؟ او بالاحرى، هل من المنطقي القول أنّ الله ينتفع من وجود الانسان ؟ الا يتعارض ذلك مع القول بان الله خلقنا لحكمة لا يعلمها الا هو، و القول بانه لا يريد منا من رزق و لا يريد ان نطعمه؟

خلاصة القول، ان القول بملكية الاله للانسان يتعارض مع ابسط اسس جميع ديانات التوحيد. فلم لا يكون الانسان ذاته هو الذي اخترع الاله ثم اعطاه حق امتلاك البشر و التصرف فيهم "على زي هواه" ؟ افلم يكن من الاجدر بنا القول بان الانسان هو الذي يمتلك الاله ؟ كيف لا ؟ وهو الوحيد الذي ينتفع من وجوده، سواء كان هذا النفع ماديا (مداخيل القنوات التلفزية الدينية، جمع التبرعات بطرق مشبوهة، توجيه المجتمعات الى نمط استهلاك معين) او معنويا (سيطرة على الرأي العام، فرض طريقة تفكير موحدة...)

لكن الانسان كذلك يتمتع بالحق في التصرف في الاله، اي حق التخلص منه، او بعبارة الطف، الاستغناء عن خدماته :))

نحن خلقنا الاله و نحن نمتلكه، فان اردنا التخلي عنه تخلينا، فحياتنا من دونه بالتاكيد افضل !!

العدل الالهي في ذهن المتشدد الاسلامي

2009-01-21T19:28:00.003+01:00

ليوم الصباح قمت مريض... راسي يوجع... حليت الشباك نلقى الدنيا باردة... بخلت عالمشية للفاك... قلت مالا نحل الفايسبوك كأيها الناس... منها نطير القلق و منها نطلع على احوال "الاصدقاء"...
حليت الصفحة الرئيسية و بديت انسنس عالشعب... ياخي نلقى فيديو مبوستينها ثلة من الطحانة حاشاكم و عنوانها
sob7an arbbi kifesh yinta9im mi jwiff
(هاو الرابط للي يحب يطلع)
توة لحكاية اصلا قديمة ياسر و عندها سنين ماللي صارت... اما الي كرزني بالحق هو هالنبرة متاع التشفي الموجودة في العنوان...
تي ازح... اذوما جماعة يشطحو في عرس و شايخين على رواحهم ياخي هبطت عليهم مصيبة قد السما...
و اذا يهود و اسرائيليين و صهاينة؟ ... ياخي ماهمش بشر ؟!
و كان تثبتو مليح اتوة تراو طفلة صغيرة عمرها قرابة ثلاثة سنين محملها بوها... اشنية ذنبها هي ؟؟ بأي ذنب قتلت؟
نعرف باش تقولولي " واطفال غزة نسيتهم؟؟ "
لا ما نسيتهمش... اما كل حاجة في بلاصتها...
الحزن على غزة لا يبرر باية حال من الاحوال التشفي في بشر اصابهم مكروه مهما كان...
و باش يقولولي الاسلام بريء منهم...
بالله شكون عندو الاسلام الصحيح يقُلّي ...
اتوة مليار و نص يقومو كل واحد يقُلّي "انا الصحيح"...
قالك "سبحان ربي كيفاش ينتقم ماليهود"...
اقعد مالا استنا انتقام ربك... اتوة هو يحرر فلسطين...
"سبحان ربي كيفاش ينتقم ماليهود"...
مَلّه رب و مَلّه هو !!
يعطيه الصحة !!
ما لقى في شكون ينتقم ؟
شبيه ما انتقمش من القواعد العسكرية الاسرائيلية ؟
اشبيه ما انتقمش من الاف الرؤوس النووية الي اسرائيل قاعدة تجمّل فيهم من عام خمسين؟
عباد توانسة في القرن 21 يخممو هكة... يعتبرو الكوارث عدل الهي... على الدنيا السلام... سلام؟ ... اي سلام؟ على الدنيا الهلاك !!
تذكرت حكاية... سنين لتالي... وقت الي جا التسونامي... إمام الجامع متاع حومتنا يخطب في صلاة الجمعة... قال الي ربي هو الي بعث الاعصار هاذا... على خاطر جنوب شرق اسيا فيها "الكفار الوثنيون" و كثر فيها البغاء... و الله ما كثر الا الغباء...
نرجع للفايسبوك... عدد "الاصدقاء" الي ينشرو فالفيديو في تزايد... زايد... الدم طلعلي لراسي... فديت... تخنقت... زدت مرضت... سكّرت لخرى و مشيت للفاك... قرايتي خير و ابقى من خرمكم يا طحانة...

السارح و المسروح به

2009-01-15T13:44:00.012+01:00

فكرة الراعي فكرة قديمة نلقاوها في جميع الاديان السماوية. ففي كتاب المزامير يبدأ الاصحاح 23 بالجملة التالية "ادوناي راعيّ فلا يعوزني شيء". كيف كيف لحكاية تتعاود مع يسوع في انجيل يوحنا 11 " انا الراعي الصالح، و الراعي الصالح يبذل نفسه مكان الخراف". نلاحظ اذا ان المرور من اليهودية الى المسيحية، من العهد القديم الى العهد الجديد، اقترن بمرور صفة الراعي من ادوناي (الاله السماوي) الى يسوع (الاله الأرضي ان صح التعبير). الملفت للانتباه في المسيحية هو اعتبار يسوع لنفسه راعي الكوني الوحيد اذ يقول "و تكون رعية واحدة و راعي واحد" (انجيل يوحنا 10 16).

مباهي، تقولولي و احنا اش مدخلنا في هذا الكل؟
هاو جايكم لحديث :
ننتقلو توة للاسلام اذ نجد هذا الحديث "كلكم راع و كلكم مسؤول عن رعيته : الامام راع و مسؤول عن رعيته و الرجل راع في أهله و مسؤول عن رعيته و المرأة راعية في بيت زوجها و مسؤولة عن رعيتها و الخادم راع في مال سيده و مسؤول عن رعيته..." (البخاري : كتاب الجمعة : باب الجمعة في القرى و المدن)
مانيش باش نحكي على تضييق الحديث هذا لدور المرأة و الا حكاية الخادم و العبودية... الّي يهمني هو الجملة لوّلة : "كلكم راع و كلكم مسؤول عن رعيته". نلاحظو هنا الي صفة الراعي انتقلت بصفة كليّة للانسان و ماعادش منحصرة عند اله و الا ممثل الاله، فيبدو لنا من اول وهلة ان هذه العلاقة ولات افقية ماعادش عمودية. و من ناحية اخرى، نلقاو الي الانسان تحمل مسؤولية اكبر امام الاله بالمقارنة مع المسيحية او اليهودية. و هنا يكمن الخطر ! اي نعم، خطر !! علاش ؟ على خاطر بالطريقة هاذي يكثر التنسنيس و تتقلص حرية التعبير و ما جاورها... و هذا هو بالضبط الي صاير اليوم في المجتمعات الاسلامية. المسلم يحس روحو بمثابة رسول في عايلتو و في المجتمع الي يعيش فيه، لذلك تلقاه النهار و طولو و هو يأمر بال"معروف" و ينهى عال"منكر" و يصدر احكام تكفر كل من لا يتفق معه في الرأي. فهو بالتالي ينغّص العيشة عالناس الي دايرة بيه الكل حتى الي ماعندهمش اعتراضات على ارائه. هالنوع هذا كثر برشة هالايامات بفضل الثورة الرقمية : تلقاه كل مرة يبعثلك مايل ينسيك في الي قبلو : هاو مرة يلزمك كي تصلي تربع يديك ما تخليهمش محلولين، هاو مرة يقلك السواك خير برشة مالدونتيفريس على خاطرو سنة الرسول؛ و الرسول يحب عاد شكون يتبعو في كل شي الا في عدد النسا الي عرس بيهم ;)
مرة قلت لصاحبي المسلم يا اخي فك على قتلي و اخطاني مالحكايات هاذي ماو في بالك بي اعتزلت الاسلام من هاك العام. جاوبني قلّي ماذا بيّ ما نقلقش خويا اما الله غالب واجب ديني نتحاسب عليه نهار اخر... في المرحلة هاذي صحيح ماهوش قاعد يقلق في برشة، اما الامر يولي اكثر خطورة كي نهار مالنهارات يولي يحكي على حد الردة و ما تابعها... و ما تقولوليش راك تبالغ على خاطر صارتلي برشة مواقف مع ناس في عمري و حتى اصغر مني، و الي يعتبرو اقامة حدود الله هي الطريق الوحيد للخلاص !!
نرجعو توة لعلالشنا، نعرف الي برشة منكم باش يقولو : "حتى المسيحية و اليهودية فيها وصاية فكرية : ياخي مالا شنوة دور الرّبِّي و الببّاص؟" إصحيح ! و هذا بالضبط فين نحب نوصل ! سبينوزا كي نقد اليهودية توجه مباشرة الى رجال الدين، كيف كيف بالنسبة للفرينسيس في عصر الانوار. اما نقد الاسلام لشكون باش نوجهوه؟ صحيح المدعوذين ، مشكورين، قاعدين يقومو بدور كبير في تبهيم امّة محمد، و الي نقدهم باش ينقص من برشة خور. اما هاذا وحدو ما يكفيش. في ظل غياب مؤسسة دينية واضحة المعالم في الدين الاسلامي، فانو النقد يلزمو يتوجه للمسلم شخصيا، و ياخذ في عين الاعتبار تفاصيل واقعو و تاريخو، على خاطر المسلم يلعب في نفس الوقت دور السارح و المسروح بيه.
ما تنجم تصير نهضة في البلدان الاسلامية الا اذا كان مفهوم الوصاية الفكرية يتنحى من امخاخ لعباد الكل و لا عاد فمة لا سارح لا مسروح بيه : هذي هي المعركة الحقيقية.

!!!عيد ميلاد سعيد لمكشّخة

2009-01-15T13:13:00.003+01:00

خبر غريب... اما قديم شوية

2009-01-12T19:44:00.000+01:00

اليوم و انا قاعد نتجول عل الانترنيت طحت بالصدفة على مدونة للحزب الاجتماعي التحرري... ياخي... نلقاها... فارغة!!!
عمّار؟
لا
ايمالا شنوة؟؟
الموقع يا سيد(ت)ي بن(ت) سيدي تمت قرصنته!!
علاه؟؟
....!
....؟
....!!!
...
..؟!

عودة و مظاهرات في معهد بورقيبة النموذجي

2009-01-12T18:53:00.012+01:00

هيا قلنا السلام عليكم... عندي برشة ما كتبتش في المدونة، من ناحية بسبب لقراية و من ناحية اخرى بسبب هالجوّ المشحون الي يميز تن بلوغز المدة لخرة، والي بفضلو تم تقسيم المدونين الى طوابير مرقمة من 1 الى 5... و نحب نعلن في هذا الاطار تكويني لطابور جديد يحمل رقم 1664 و الي شعارو "إذا كان الكلام من فضة فإن البيرة من ذهب"... نرجع لموضوع المدونة... انا شخصيا قطعت عهد على نفسي من هاك لعام باش ما عادش نشارك لا في مظاهرة لا في تظاهرة و لا وذني... اما برجولية يعطيهم الصحة اولاد (و بنات) المعهد لقديم متاعي في القريف الي عملوها... حتى مظاهرة يعملوها بفن

و رغم هذا و كلو، تقعد عندي تحفظات على التظاهرات هاذي و أهمها :
*التطويع الايديولوجي لحركات تلمذية عفوية : اذ انو الشعارات كانت من نوع " لا اله الا الله و الشهيد حبيب لله" او "خيبر خيبر يا يهود جيش محمد سيعود"...
*استغلال الظرف العام لتبرير الغيابات : بالله الي يحب يغيب يعطي لخوه اوبرمنش خمسة لاف (فرنك و الا بيرة... اما مالمستحسن بيرة) وينحي عليه مالرويق متاع قضية و ما قضية... نولّيوش نتعلمو في النفاق مالصغرة ;)

و هاذي تدوينة بيضاء

2008-12-25T14:06:00.001+01:00

أوبرمنش يهنئ المسيحيين بعيدهم المجيد رغم أنف المنجد الحقير

2008-12-24T19:03:00.014+01:00

كيما تعرفو خوكم أوبرمنش لا عندو لا مع ليهود لا النصارى لا المسلمين. وفي ما يتعلق بالنصارى، انجم نختزل موقفي مالمسيحية في الرسم التوضيحي التالي (رغم الي مانيش ماخذو مسلم بيه و عندي شكوك في مدى صحتو)

أما راهو كي لومور تولي فيها تحريض على الكره و العنف (المادي او المعنوي) بطريقة مباشرة و الا غير مباشرة فانو يولي من واجبي كوني ناقف مع المظلوم مهما كانت صيفتو و الا معتقداتو...

الحاصيلو نهيرين لتالي عملت طلة على الموقع هذا (حكيت عليه قبل لهنا) و الي يشرف على تأثيثو سي محمد صالح المنجد و ما أدراك. و يا هول ما رأيت ! (هنا و هنا و هنا و هنا)

السيد عمللنا درس في كيفية زرع الكراهية و الحقد و البغض في نفوس أصحاب العقول الضعيفة من المسلمين

ملخصه، المسلم ما يلزموش يهني المسيحي بأعيادو الدينية و ما يلزموش يحتفل معاه و الا ياكل ما تيسر من الدندون (حتى لو كان حلال) و البيش دي نويل : سينون يولي "يتشبه بالكفار" و العياذ بالله، و ينجم ماليوم يتهنى على بلاصتو بحذا داروين و بني اسرائيل في جهنم و بئس المصير!!

توة هذا كلام يتقال في عالم تثار فيه الحروب باسم الاله و ذلك لاتفه الاسباب؟ هل يعي المنجد و أمثاله خطورة لكلام الي يقولو فيه و الي تنجم تتولد عليه عواقب وخيمة؟ ما ظاهرلي!! السيد هذا و غيرو قاعدين يحولو في الاسلام من دين عالمي الى طائفة منغلقة على ذاتها و منعزلة عن بقية العالم سواء على المستوى الجغرافي (تركيز مفهوم عالم اسلامي) أو التاريخي (حركات السلفية)

اذا شماتة في ابن تيمية و المنجد و من تبعهما ببهامة الى يوم الدين، يتقدم أوبرمنش باحر التهاني الى كافة مسيحيي العالم (حتى الي مازال بكري على نويلهم) و يهنئهم بعيد الميلاد، أعاده ديونيزوس عليهم بالخير و الدندون و البيرة

عاجل : عمّار يحجب نافذة إشهارية

2008-12-19T21:59:00.006+01:00

Pop-up في خطوة غير مسبوقة قام عمار مؤخرا بصنصرة نافذة اشهارية او ما يعرف بال

و ذلك لأسباب لا تزال غامضة، إذ تولى أوبرمنش شخصيا تفقد الموقع المذكور باستعمال أحدث تقنيات مراوغة الحجب و أكد في تصريح له خلو الموقع من كل ما له علاقة بالسياسة من قريب أو من بعيد و كذلك عدم نشره لأية محتويات تخرج عن نطاق الأخلاق الحميدة و العياذ بالله.

و عبّر أوبرمنش عن استيائه من تصرفات عمّار و شركائه معتبرا أن العملية الأخيرة تمثل الدليل القاطع على أن حجب المواقع من طرف السيد عمار عملية اعتباطية بحتة لا تخضع سوى لقاعدة واحدة هي عدم المس من حرمة المدونات و المواقع القزوردية نظرا للخدمات الجليلة التي تقدمها للوطن..

إنجيل أوبرمنش

2008-12-16T18:28:00.003+01:00

لعنة من أوبرمنش و أصحابه تلقى على الجاهلين (1) اللذين جعلوا رزقهم بيع الطحين (2) واللذين تركوا العقل و انغمسوا في الدين(3) و الذين ينفون الحياة و يتوقون إلى جنات النعيم(4) فكانوا عن العلوم معرضين(5) و بكتاب قديم متشبثين(6) و صوب الجدار متوجهين(6) يا حسرة على العباد إذا كانت لهم حضارة أقبلوا على هدمها مدبرين(7) ثم ينظرون إلى الوراء و يشدهم إلى الماضي الحنين(8) فإذا قال لهم العقلاء اعملوا قالوا دعونا في غفلتنا نائمين(9) لعنتكم الأرض و السماء و ما بينهما يا لكم من جنس لئيم (10)

و جاءهم من أقصى الغرب رجل يسعى يبحث عن الأسود الثمين(11) فلبث عندهم خمسة أعوام و بضع سنين (12) يستنزف ثرواتهم و هم إليه ينظرون(13) و يقولون ربنا ارحمنا إنا لمظلومون(14) قد طال الانتظار و إنا إن شاء الله لصابرون (15)

فلما حان وقت الفراق ضربه أحدهم بنعل فقبضوه(16) فخرجت الحشود تمجد البطل المزعوم (17) انتظرناك طويلا يا رمز الصمود (18) هل هذا قول قوم يعقلون (19) ولهم حضارات هم بها يفتخرون (20) فلا أقسم بقبة التدوين(21) و إنه قسم لو تعلمون عظيم (22) إنكم لفي خسران مبين(23) و ما أنتم بمنتصرين(24) ولو بعد آلاف السنين(25) إلا إذا اتخذتم العلم منهجا و تركتم الطحين(26) و ما ذلك عليكم بعسير(27) سلام قولا من أوبرمنش حكيم(28)

لا يستحي أوبرمنش أن يضرب مثلا ما بلادا كالصّين(29) ثلة من الملحدين و ثلة من الشيوعيين(30) قوة عظمى و اقتصاد متين(31) هل آتاكم حديث فولتار ديمقراطية و حقوق إنسان(32) فلا جور بعد اليوم و لا طغيان (33) وأمريكا ذات البنيان(34) التي لم يوجد مثلها في تاريخ الإنسان(35) فهل اتبعوا كتابا مقدسا أو اتبعوا كلام قرآن (36) كلا بل هم لمسائل السماء لتاركون(37) و إلى الإنسان يلتفتون(38) و في العلم و الفضيلة منغمسون(39)

أيها القوم هذا إنجيل أوبرمنش لعلكم تفرحون(40) طوبى للمرتدين فإنهم براحة الضمير سوف ينعمون(41) طوبى للعلماء فإنهم عبر الأجيال سوف يمجدون(42) طوبى للمبدعين فإنهم الأرض سيرثون(43) طوبى لشاربي البيرة فإنهم سيسعدون(44) افمن هذا الحديث تعجبون و تقولون كفر و تكذبون (45)كلا سوف تعلمون ثم كلا سوف تعلمون(46) كلا لو تعلمون علم اليقين(47) لترون النعيم(48) ثم لترونه عين اليقين(50) ثم لتسألن يومئذ أين الجحيم(51)

من الان فصاعدا على الجميع نزع أحذيتهم قبل مقابلة بوش

2008-12-16T17:33:00.001+01:00

الرد الشافي على عاشور الناجي

2008-12-11T20:43:00.009+01:00

أولا و قبل كل شي نحب نشكر الناس لكل الي وقفو مع فكرة وكيبيديا بالتونسي و على راسهم سيدي علي و سي طارق
و نحب زاده نشكر جميع النبارة من مناضلي حزب "فك عليك" و حزب "ماعندك وين توصل" و الاحزاب الاسلامية و القومية العربية المعهودة، و على راسهم زميلنا في الكفاح سي عاشور الناجي و الي بالمناسبة نهديلو البوست هذا
و نظرا لضيق الوقت بسبب القراية فاني باش نذكر فقط بعض الملاحظات الي ما نجمش يجيني النوم كان ما نقولهمش
هو صحيح الي التونسي ياخذ مالعربي برشة حاجات في لكلام و قواعدو، اما اللوغة عمرها ما كانت مجرد كلمات و قواعد نحوية و اكهو : اللوغة هي مرآة المجتمع بكلو : بتاريخو، بثقافتو، بعاداتو و تقاليدو... اذاكا علاش ما نجموش نحكيو على واقعنا اليوم باستعمال لوغة عندها 14 قرن
انا ما قلتش الي باش نرد التونسي لوغة وطنية (كي تجي تشوف علاش لا؟) اما المبادرة تتمثل في فتح ويكيبيديا بالتونسي و باع و روح، و الهدف من هذا هو توصيل المعلومة لاكبر عدد ممكن باش الفايدة تحصل للجميع بدون استثناء
العربية لوغة حلوة و عندها شاعريتها و كل، اما حتى الاغريقية و اللاتينية باهين ياسر زادة، و لزوز ساهمو برشة في الحضارة الانسانية... اما كل وقت و وقتو، و الدنيا ادور، و العالم يتبدل، و تمشي ناس و تجي ناس، و تمشي لوغات و تجي اخرى...
واللوغات تخضع لقاعدة التحول المستمر، و الوقوف في وجه هذا التحول هو تطليع الما في الصعدة موش العكس
ذكرت مثال الانقليزية في أمريكا و استراليا، و انا نقلك الي لولاد الصغار في البلدان هذوما ما يقعدوش يحكيو 6 سنين بلوغة و مبعد يمشيو للمكتب يلقاو حكاية اخرى، و انا نعتقد الي الصدمة اللغوية هاذي هي الي تخلي نسبة الجهل مرتفعة في دول الشرق الاوسط و شمال افريقيا (عندي الحساسية من كلمة العالم العربي)
نستغرب كيفاش هالموقف يجي من انسان عندو باع و ذراع في الالحاد، خاطرني نعتبر الي من اسباب بقاء هاللوغة هو خوف رجال الدين على دينهم من ناحية، و رغبتهم في ترك مفاتيح فهم الدين هذا في ايديهم هوما برك من ناحية اخرى : رجال الدين يقولولك باش تولي فقيه في الدين و تفتي في لعباد، لازمك تكون اول حاجة عارف باللوغة العربية، و لذلك كل ما يجي واحد باش ينقد حاجة في القرآن ديريكت ينقزو عليه و يقولولو اش تفهم منو انتي و من وقتاش تعرف العربية و هات ماك اللاوي : نظن الي كان جا القرآن مترجم للتونسي والا الدزيري و الا المغربي راهي نسبة الالحاد في هالمجتمعات تضرب تصرع
في النهاية نحب نقول كيما قال طارق الي لحكاية ما هياش عركة بين لوغتين اشكون تقتل لاخرى، على خاطر الانتقال الى لوغة جديدة حاجة فارضها علينا قانون التطور بالضبط كيما الانتقاء الطبيعي : و احنا ما نحبو كان نختصرو المسافات الزمنية باش كيما يقولو نلحق بركب الدول المتقدمة

!شتان بين ويكيبيديا العربية و نظيرتها الأعجمية

2008-12-10T21:30:00.003+01:00

كي جيت نكتب في التدوينة متاع حقوق الانسان، حبيت نحط رابط يهز للمقال متاع "كورش أو القرش الاكبر" في ويكيبيديا، ياخي لفت إنتباهي البوْن الشاسع بين المقالين العربي و الفرنسي.
المقال الي بالفرانساوية، رغم بعض النقائص، كان عمل موسوعي من ناحية أنو حكى على مختلف مراحل حياة هالشخصية لعظيمة و تأثيرها في التاريخ.
امّا المقال الي بالعربي، الله لا يوريه لحبيّب : أربعة أسطرة تقديم عام، و البقية بحث في إمكانية أنو كورش و ذو القرنين يكونو نفس الشخص. و باش يورينا موضوعيّتو، بدا الكاتب بالحديث عن شخصية ذي القرنين في العهد القديم ومبعد في القرآن، و الانتقال هذا يلاحظ بكعبة "بسم الله الرحمان الرحيم" قد راسو!
لهالدرجة التخلف وصل حتى لويكيبيديا؟

ويكيبيديا بالتونسي... علاش لا؟

2008-12-10T21:06:00.001+01:00

الحق انا ما صدّقتش المرة لوّلة... اما المصراوة طلعو عاملين ويكيبيديا بالمصري تعمل 66 كيف! و هاو شوفو بعينيكم
عاد قلت آش ناقصين أحنا عليهم؟ ماهو نعملو حتى احنا ويكيبيديا بالتونسي، بما انو جماعة المدونات ابدعو في لوغتنا المزيانة!
اش قولكم؟

الإعلان العالمي لحقوق الأنسان : كلام حلو.. اما التطبيق وينو؟

2008-12-10T19:51:00.002+01:00

ستّين سنا لتالي، الجماعة الي ربحو الحرب العالمية الثانية لمو رواحهم وقالو: زعمة اش لازمنا نعملو باش الحرب هاذي ما تتعاودش و العالم الكل يعيش في سلام؟ و بعد البحث و التمحيص طلعو بفكرة الاعلان العالمي لحقوق الإنسان، و الي يتمثل في ثلاثين فصل فيهم كل ما يتعلق بالحقوق و الحريات. هو كي تجي تشوف الفكرة ماهيش جديدة بالكل : القرش الاكبر عمل حاجة كيفها من وينو، و تعاودت المعبوكة في انقلتيرا و فرانسا بعد مديدة..
الحاصول، هي لحكاية موش دونية بالكل، اما مع الاسف ما نجمتش تاخذ طابع الزامي باش الدول الكل تحترمها.
قبل ما نبدى نحكي على الاعلان في حد ذاتو، نحب انقول الي وقتلّي جاو باش يصوتو في الجمعية العامة على هالاعلان، فمة ثمنية دول امتنعو عن التصويت، و شاءت الصدف كونو البلدان اذوما يكونو الإتحاد السوفياتي و ثلة من العالم الثالث، على رأسهم السعودية الي ما عجبتهاش حكاية المساواة بين الراجل و المرا... تي لا علينا...
نجيو للرسمي : فمة برشة مواد تتعارض بشكل صريح مع الواقع الموجود توة :
* المادة 3 تقول "لكل فرد الحق في الحياة" : و حكم الاعدام الي مازال يتطبق في برشة بلدان، ما يعتبرش اعتداء على هذا الحق؟
* المادة 5 متاع التعذيب و المس من الكرامة زايد باش نحكيو عليها
* المادة 9 جا فيها "لا يجوز القبض على أي إنسان أو حجزه أو نفيه تعسفاً" و لحكاية هذي ظاهرلي ما عادش تجد على حد بعد هالمعاهدات الي يعملو فيها كل نهارين ثلاثة متاع مكافحة الارهاب
* المادة 13 فقرة 2 تقول إلي "يحق لكل فرد أن يغادر أية بلاد بما في ذلك بلده" : عالحساب هذا فاش قام الفيزا؟
* المادة 16 فقرة 1 : "للرجل والمرأة متى بلغا سن الزواج حق التزوج وتأسيس أسرة دون أي قيد بسبب الجنس أو الدين" : سن الزواج ما وقعش تحديدو، معنتها كان يجي واحد بوكشطه في بلاد معينة يقول الي سن الزواج 6 سنين بانسبة للبنات حد لا يكلمو و لا يدور بيه
* المادة 19 "لكل شخص الحق في حرية الرأي والتعبير، ويشمل هذا الحق حرية اعتناق الآراء دون أي تدخل، واستقاء الأنباء والأفكار وتلقيها وإذاعتها بأية وسيلة كانت دون تقيد بالحدود الجغرافية." : و عمار يقعد بطال؟
* المادة 23 فقرة 3 "لكل فرد يقوم بعمل الحق في أجر عادل مرض يكفل له ولأسرته عيشة لائقة بكرامة الإنسان" : بالطبيعة الي يخلصو في 13 دولار في الصين و بنات المعامل الي ياخذو في 70 دينار فالشهر في بلد الفرح الدائم ماهمش معنيين بالكلام هذا
* المادة 24 تحب على تحديد معقول لساعات العمل : شمعنتها معقول : 15، 20، 24 ساعة في النهار... الله اعلم
* المادة 25 "لكل شخص الحق... في تأمين معيشته في حالات البطالة..." ههههه

هاذي شوية محاولات نقدية نعرف الي هي ناقصة برشة تعمق، و متأكد انو فمة برشة فصول ما ذكرتهمش يستاهلو الكلاط، اما حبيت جيست نورّي الي الاعلان العالمي لحقوق الانسان ماهوش نص كامل و متكامل و الي انجمو ننقدوه من غير حتى إحراج

مرحبا بكم في مملكة إفريقيّة العربية الإسلامية

2008-11-25T19:10:00.001+01:00

ظلمة

2008-11-25T18:58:00.004+01:00

ما شفتو شي؟ ما عندكم ما تشوفو : هاذاكة هو حال الدغرارة الي عاملتهلنا شركة نقل تونس باش تقينا من شر الميترو الخفيف

!إفتحوا المعابر

2008-11-23T21:36:00.002+01:00

البيرة، ديونيزوس و الدين الحق

2008-11-20T17:18:00.006+01:00

جميعة لتالي خوكم أوبرمنش ؛ ماهو قلوقي ؛ بدا يفد مالإلحاد و نيتشه و الريق البارد. قلت برة نلوج فماش دين يملى العين خلي الواحد يبدل بيه الجو. لوّجت لوّجت شي، الدين على حسب مواصفاتي أنا ماهوش متوفر حاليا في الأسواق.

وانا مروح نلقى واحد لابس كشطة حبني نعنّق الإسلام والا شنوة، وبدا عاد يحكيلي على التوحيد والألعاب و كيفاش محمد اخر رسول و هو الصحيح (بالمعنى لوّل و الثاني متاع الكلمة)، واللي قبلو الكل يحشيو فيه وكان نتبعو يضمنلي واد بيرة و فوق السبعين زبور على ذمتي. برجولية عجبتني حكايتو و شرهت على هالدين ياخي خذيتو في وقتو و خلصت السيد بالحاضر .
و بعد المبروك و هاك اللوغة بعثني إل أقرب جامع باش ندخل في الدين على قاعدة صحيحة. وانا نمشي منتصب القامة مرفوع الهامة يعرضني النديم متاعي "عياش مالمرسى". حكيتلو لحكاية ياخي ما نرا كان في وجهو يصفار و يخضار ويقلي "عملت العار يا أوبرمنش عملت العار! ماللي كنت ملحد باش إتدّوّرها مسلم ضربة وحدة! ياخي ما فيبالكش في الإسلام محرمين البلعة و الجنس من أجل المتعة! ايا بدل الساعة بساعة اخرى و نمشيو نعملو بلعة وطنية وإلا حتى عالمية فماش ما تخطاك من هاللوغة البهيمية"
و في الحين شدينا الرحال لأقرب حانة وخذينا اربع من بنات الشعير. بعد شوية تحير علي الضمير و قلت "يا عياش برجولية خلي نمشي بركة نصلي حتى صلاة وحدة باش ما نقولش ضيعت فلوسي فالفارغ" تكرز عياش و قال "اش بيك مارق؟ هاي دبوزة مرناق تشيخك في مخك و تنسيك في ربك".
وكي حسيت روحي وصلت للنشوة القصوى سئلت عياش المرسى : "اشكونو رب البلعة؟" قلي : "ديونيزوس". فخررت ساجدا من الشيخة (موش الخشية) الديونيزوسية وقررت من وقتها باش نولي من خلفائه على الكورة الارضية.
كي روحت للدار، قعدت ندور في الحكاية في مخي (او بالاحرى مخي هو اللي كان يدور في الوقت اذاكا) و قلت ياخي كيفاش واحد يوعد لعباد بالبيرة في الاخرة و هو عمرو ما ذاقها في الدنيا : لحكاية فيها إنّ.
وبعد البحث و التمحيص و ماخذة التراخيص و صلت للنتيجة التالية : محمد كي كان صغير كان يموت عالبلعة بالسكات و الرياض و مايحبش الجوجمة و تكسير الراس، ياخي لقى مغارة إسمها حراء ولى يبلع فيها وحدو (ويحه اما سمع بهذا الحديث؟). و بماانو كان تاجر يمشي برشة لبلاد الشام فانو خالط برشة رهبان علموه كيفاش يصنع البيرة و الشراب وحدو في الغار متاعو، و زاد سمع اللي الجماعة اذوكم يستناو في واحد باش ينقذ العالم، ياخي روح لمكة و بدى يمشي يبلع و يتخيل في روحو هالمنقذ اللي يستناو فيه.
للي جا نهار بلع فيه بلعة لقضا و بدى يتخيل في واحد عندو جوانح يحكي معاه. بعد مدة تخيل روحو طلع لديونيزوس و حكى معاه و فرض عليه الصلاة 500 كعبة بيرة في النهار، و بدات وقتها المفاوضات حتاكش طاحت لخمسة كعبات برك.
وهو مروّح بين هوا و فضا خدم مخو و قال "كان يقعد مجال البلعة مفتوح لجميع المواطنين فإنو ذالك يمثل خطر كبير على الدين خاطر اي واحد ينجم يتخيل اللي تخيلتو و يولي يهز و ينفض وحدو" و إنطلاقا من هالملاحظة الصغيرة بدى يبدل في التعاليم الاصلية للدين و بدى يحرم في البيرة تدريجيا. و هوني نفهمو علاش حرّم الاسلام البيرة ووعد بيها في الاخرة كجزاء على التخلي عنها في الدنيا.

و توة خليوني نمشي نعطي حق ديونيزوس!

ملاحظة : بعض ماجاء في هذا المقال مستوحى من حكاية الشاعر الأعشى الواردة في كتاب "رسالة الغفران" لأبي العلاء المعري

Petite pensée matinale : Allah et les pronoms impersonnels

2008-11-15T07:50:00.005+01:00

On sait tous que l'Islam prétend que Allah ne peut pas être défini en genre : il est ni mâle ni femelle. D'autre part, les musulmans prétendent qu'Allah a choisi la langue arabe comme langue du Coran car celle-ci est une langue très développée et qui est la seule à pouvoir nous transmettre le message divin. Or, et comme la langue arabe ne possédait pas de pronoms impersonnels, Allah a toujours été désigné par "houwa" qui est la forme du masculin, ce qui est absurde vu notre thèse de départ. Le tout-puissant peut-il se permettre de négliger un détail aussi important en envoyant le plus infaillibles et le plus limpide de ses messages? N'aurait-Il pas du choisir une autre langue qui posséde des pronoms impersonnels, et Dieu sait (c'est-à-dire lui-même) comme elles sont nombreuses? à méditer...

خواطر ما بعد الدربي

2008-11-09T17:51:00.004+01:00

اليوم تفرجت كيما برشه توانسة في دربي الكليب و الترجي : الماتش هايل ياسر و تسجلت فيه 4 اهداف كاملة اللعب كان جميل و متعة للناظرين، اما شنوة كالعادة عندي شوية ملاحظات حبيت نقولهم

1 اللغة اللي يحكي بيها المعلق و اللي لاجات لا عربية فصحى و لا دارجة : هاللوغة هاذي ما عندها حتى علاقة بلغة الجمهور الرياضي : عمركمش سمعتو واحد في الستاد يقول تماس والا تسلل؟ يظهرلي زودنالها شوي في حكاية سياسة التعريب. عندي صاحبي مرة قلي و احنا ماشين للستاد "أحسن مشروع تحلو في تونس هو قناة تنقل الماتشوات بالسبان و التربريب" انا ما قلتش المذيع لازمو يهبط يكفر في التلفزة اما عالاقل يحكي كيما يحكيو لعباد، موش يبدى حازق روحو و يطلع في لكلام بالسيف

2 الملاحظة الثانية تخص حمدي القصراوي القول متاع المكشخة واللي ماللي بدى يكور و هو عندو سيري متاع كلام زايد لازم ما يقولها كل ما يشد الكورة وبما انو الكامرا تعمل عليه قرو بلان و زيد تعاودها بالرالنتي فانو موش لازم نكونو خبراء في قراية الشفايف باش نعرفوه فاش يتمتم : يا سي حمدي راهو ما يخرجش عليك الشي هاذا، اساعة ماشي في بالي بيك تصلي و تخاف ربي؟

3 على ذكر الصلاة نحب نقول اللي اليوم في التلفزة وراو طفلة متحجبة قاعدة في فيراج الكليب (بدون تعليق)
نحب زادة نحكي عالغنايات اللي يغنيو فيها في الستاد و اللي تمثل حالة السكيزوفرينيا اللي يعيشها الشعب التونسي : ففي فيراج الترجي مثلا كي كانو خاسرين كان يغنيو بكل خشوع : "يا ربي يا عالي انصر ترجي" و بعد ما عدلت الترجي كلها هبطت تغني في "موش لازم التحليل و رانا موتى". على فكرة، مرة في الستاد وانا قاعد فيراج هبطو يغنيو في يا ربي يا عالي، يا خي تلفتلهم راجل كبير في العمر و قاللهم "جبتو الصيد من وذنو، ياخي ربي باش يهبط يكور؟ كان جا هكاكة راهي السعودية هزت كاس العالم من هاااااك العام" ههههه

4 فيراج الترجي شعلو فلامات في الميتون الثاني، و بغض النظر على الخطر الصافي متاع لفلام (صدقوني شديت وحدة في يدي و نعرف على شنوة نحكي) فانو الفلام تساوي ستة شهور في بوفردة لذلك ماذابيه الواحد يخمم مليح قبل ما يشعل

5 اخر ملاحظة تتعلق بدخلة الكليب في الميتون الثاني و اللي صورو فيها خريطة تونس فوقها شعار الكليب و كتيبة بالسوري معنتها " راهي متاعنا". يا جماعة راهي تونس متاعنا الكل و ماهيش متاع لكليب اكهو، راهو ما يجيش منو لكلام هاذا و قتلي الجماعة عاملين حوار و قاتلين رواحهم على خاطر تونس. عيب راهو عيب