توة تقريب جمعتين لتالي، تفاجئت كي قريت التدوينة هذي متاع الزبراط، و الي يتحدث فيها على مجموعة على الفايسبوك أخذت من كرة القدم التونسية مطية لنشر ثقافة عنصرية و غرس النعرات القبلية بين ابناء الوطن الواحد. لكن مما زاد اثار اشمئزازي هو وجود مجموعات اخرى ماعندها حتى علاقة بالكورة قاعدة تنشر في افكار لا يمكن وصفها الا بالعنصرية المقرفة!!
تنجمو تشوفو مثال لهنا لمجموعة تطالب بأن تكون ولاية بنزرت "بالفيزا" وذلك للحد من الهجرة الغير شرعية ل... مواطنين توانسة كيفهم !!
كيف كيف لهنا مثال اخر و هو حزب اليمين المتطرف ال... طبلبي، والي ينادي بوقف الاستيطان الي واقفة وراه جهات خطيرة كيما ال ك*جي*بي (كاف، جندوبة و باجة)
انا مافهمتش هالناس هذي تحكي بجدها و الا تفدلك ؟ على خاطر كان تفدلك فنعلمهم انو تفدليك ماسط لاسط و ينجم يوصل لنتايج لا تحمد عقباها... و كانهم يحكيو بجدهم... وقتها يا خيبة المسعى !!
مرة في الستاد عباد تزايد على بعضها في شنوة العقاب الي محضرو لاختو في حالة تعرس بواحد ساحلي... واحد يقول نضربها لاخر يقول نطيحلها فمها، لاخر يقول نقتلها... معنتها بهامة اثنين في واحد : منها يسمح لروحو باش يتدخل في مستقبل اختو، و منها يزيد عليها بهامة متاع عنصرية غبية...
اكا النهار ركبت مع تاكسيست في العقد الرابع من عمره، قعد يحكيلي كيفاش طلع معاه مره واحد اصيل الساحل، ياخي كي فاق بيه من لهجتو تعارك هو وياه و مبعد هبطو !! اي نعم طردو مالكرهبة على خاطرو ساحلي !!! والراجل يحكيلي فيها على اساس عمل بطولي يستحق كل التشجيع !!
حبيت نسوق المثالين هذوما باش نوري الي الحكاية فاتت حدود الفذلكة و المنافسة الرياضية و ولات تهدد الوحدة الوطنية. في الاخير نخليكم مع صورة لاحد النتائج الممكنة لاختبار في فايسبوك يحددلك من انا بلاصة في تونس انتي، و قولولي اش قولكم ؟
هناك 5 تعليقات:
هي الوحده الوطنية متاع شكون خلي نتضامنو معه و نعملولها نهار متاع شجب و تنديد
mechine fi 7it
الإشكال أنُّ بعض الناس الكبار المتعلمين، الموجودين في مراكز القرار في بعض الأحيان عندهم أفكار من النوع هذا
قاعد نقرا في بعض التدوينات انو الناس فاقت اخيرا على انا التوانسة دخلين في حيط كيما تدوينة بنت عايلة واوفرمان وغيرهم
نحب نقول ملاحظات:
انو تونس بدات الدخلان في الحيط منذ مدة، هي اصلا بدت تدخل في الحيط منذ نصف قرن وقت الي وقع تحويل وجهتها من طرف نخب متغربة عملت باش تمرر مشروع مجتمعي تابع لفرنسا ومناقض لهوية البلاد، وانجر عليه اقتلاع التوانسة من جذورهم، ونتيجة هالاقتلاع المتواصل ماتكون كان، ايجاد ناس منبتين متبذبين فارغين مشوشين ذهنيا يكرهوا انفسهم وحضارتهم ويحب الغرب اكثر من انفسهم امعات يتبعوا كل مايقولهم الاعلام التافه محليا وغربيا
ولكن منذ 20 سنة، زادت سرعة الانحدار والاقتلاع للتونسيين عن طريق جرعات قوية من الاقتاللع والالحاق بالغرب، وهذاكة علاش تزايدت مظاهر الضياع عند التوانسة الي هي اصلا كانت متواجدة من قبل، ولكن كانت تمضي بطريق تقبلو الناس ومايصدمهاش
- بمعنى اخر، تونس ميش داخلة في حيط، الحقيقة هي دخلت في حيط من هاك العام، وتوة قاعدين في مرحلة تخبط الميت
- والدليل انو الناس الي تتحدث وتساهم في الحلول كيما كتاب هالمواضيع بالتدوينات، هم بيدهم نتاج للمشلكة بل هم انفسهم مظاهر لجيل الضياع والدخلان في الحيط، مادام المتحدثين، هم انفسهم ينطلقوا من خلفيات هي نفسها نتاج الدخلة في الحيط الي وقعت منذ نصف قرتن وتزايدت منذ 20 سنة
والا اخي ثمة دخلة في حيط اكثر من انو الواحد يكفر بدينو ويحب الغرب وثقافتو ويشوف في كل مظاهر الهوية متاعو من لغة ودين تخلف ويفتخر بالانحرافات من سكر وزنا وتعري واختلاط، ووقت الي واحد يجيك يدافع على هالانحرافات، هذاكة، يتسمى دخل في حيط وخطف الدورة
الخلاصة البلاد مهلوكة ومايلزمها كان حلول جذرية
مثلا اعادة الفتح الاسلامي من جديد
ههههههههههه
إرسال تعليق