هيا سيدي مشيت عملت قهيوة نعمر بيها راسي و قصدت ربي للمسرح البلدي باش نتفرج في فيلم تونسي إسمو المشروع، ياخي نلقاها حضبة و قول تقولش عليه يوم الحشر. حبيت ندبر تيكي ياخي شي "قيشي فيرمي" قلّك. فهمت روحي و مشيت للريو خاطر فيها فيلم تونسي زادة إسمو "خمسة" (بالعربي شينكة). هي هي و كليت فرشة مرة اخرى و طلع قيشي فيرمي هو زادة. قعد عندي الاختيار بين زوز افلام : واحد طليان و واحد اثيوبي من صنف الميزانيات المحدودة. برجولية موش محقرانية والا حاجة اما هي جودة الصوت و الصورة في قاعات تونس محدودة من عند ربي نزيدو نكملو عليها فيلم ميزانيتو محدودة؟
الفيلم الطليان إللي مشيتلو اسمو
La stella che non c'è
بالعربي "النجمة اللي ما هيّاش" و يحكي على جنيور طليان مشى للصين باش يصلح مكينة تشرات من إيطاليا... لحكاية مالاول تظهر مالحيط اما بالشوي بالشوي تولي مشوقة : السيد يعمل في دورة في الصين و يتفرج في الفقر و الميزيريا و المشاكل. المخرج "جياني اميليو" ركز برشة على الاولاد الصغار و كيفاش يلعبو و ما على بالهمش بالطقس وهو ما عطى نفس طفولي حلو ياسر في الفيلم. الممثل الرئيسي "سيرجيو كاستيلليتو" ما عندي ما نقول فيه ياسر قوي و فمة لقطة قرو بلان على وجهو اللي ملامحو تتبدل تدريجيا للي يهبط يبكي بدموع حقيقية موش بالبوماضة متاع الافلام المصرية
الفيلم هايل ياسر ونسّاني في النواحي التنظيمية واللي تقعد ياسر ناقصة
ليست هناك تعليقات:
إرسال تعليق