جولة بين صالات أيام قرطاج السينمائية الجزء الثالث

البارح مشيت لفيلم اخر إسمو
De l'autre côté
الفيلم ألماني اما الاحداث تصير بين المانيا و تركيا و فيه ممثلين اتراك مثلو في الفيلم اللي حكيت عليه لهنا.
الفيلم ممتاز من جميع النواحي : الاخراج، الصورة، الصوت، الموسيقى...
قصة الفيلم منقسمة على ثلاثة حكايات متصلين ببعضهم :
1-راجل تركي وولدو عايشين في المانيا، الراجل عمل علاقة مع ق؟؟؟ تركية و مبعد قتلها، ياخي ولدو مشى لتركيا باش يلوج على بنتها
2-بنت المرا اللي ماتت و اللي هي مناضلة شيوعية تركية هاربة لالمانيا
3-واحد الماني عايش في تركيا و تحير عليه فجأة الحنين الى الوطن و ولى يحب يروح لالمانيا ياخي باع المكتبة متاعو للسيد اللي جاي يلوج على الطفلة
الحاجة الباهية في الفيلم هي كونو الناس اذوما يتقابلو في برشة بلايص من غير ما يشعرو..
مانحبش نزيد نحكي باش مانحرقلكمش الفيلم، و باش نرجع للنواحي التنظيمية

الفيلم تعرض في قاعة الكوليزي و الناس الكل تعرف اللي الفضاء اللي قدام القاعة مغطي و الواحد يحس روحو مخنوق من ربي، و رغم هذا الكل فمة ناس هبطت ترحي في الدخان تقول عليهم عندهم أشهرة ما تكيفوش. ولاش الواحد يطلع يدهدص في الدروج ما عاد شايف شي من كثر الضباب؟ توة اذومة ما يحشموش على رواحهم تلفزة تصور و ناس جاية مالبرّة تتفرج؟ والله عملتو العار
تي ازح علاش ما تخرجوش البرّة تتكيفو كي الناس المتحضرة؟