أقوى نكتة في 2009

يا عمار يا وخي.. هز الحجب شوي..

آه يا عمار راك قهرتني... صحة لامك كنت لاهي الجمعة الكلها.. اما ما تفرحش برشة.. ماشي في بالك الحكاية بش تقعد جمعة و من بعد تبرد ؟ دويوْ !! الحملة بش تتواصل العام كامل.. حتاكشي تفهم روحك و تجيبها برجلة... سينون هانا قاعدينلك كالشوكة في حلقك.. ماشي في بالك كي تصنصر مدونة و الا اثنين عملت حاجة كبيرة ؟ اتفرج في الفايسبوك كيفاش شنع !! اما زايد.. الطحان يبقى حياتو كاملة طحان..

يا عمار... برجولية كثرت على ما وصاوك !! توة كي تحجب مواقع البرني نفهمك، نقولو الانترنيت مخلطة و برشة صغار.. كي تصنصر مواقع الارهاب و الريق البارد مشات معاك.. اما هذي حكاية تصنصير مدونات و مواقع متاع ضحك و تفدليك ما جات شي راو (مثال ديزونسيكلوبيدي في نسختها العربية محجوبة في تونس)... يا دين السما حتى الضحك تحب تحرمو علينا؟ تي جيبها برجلة و رجعلنا موقع و الا اثنين !! توة اليوتيوب و الدايلي موشن قلقوك ؟ اه فيهم فيديوات موش باهين ؟ اعلاه ما تنصنصرهمش هوما و تخلي الكازي محلول ؟ تي هاك طلعت خبير في الحجب الانتقائي، بش تصعب عليك هذي ؟ يا سيدي اش تحب مالاخر ؟ تحبنا نقففو و نهزو شوية طحين ؟ هذاكة الي بيك ؟ توة نعمل لخويا تدوينة قزوردية مرة في العام... اكثرشي من هكة ؟ اما نعرف الي زايد.. و ماكش بش تحلهم اليوتيوب و الدايليموشن على الاقل في المستقبل القريب (زعمة زعمة عزة نفسي ما بتسمحلي... شوف اكا النفس العزيزة الغالية..) اما كيما يقولوها : هاني حاطك في مخي للماكسيمو... و ان عدتم عدنا... كلمة الختام للمدون المصري كريم عامر : "الى كل اعداء الحرية من رموز البغي و الجور و الظلم و التسلط... ستزدحم بكم مزبلة التاريخ و لن تترحم عليكم الاجيال القادمة و لتعلموا ان الغد لنا. فأيامكم قد غدت معدودة و ليلكم شرف على الزوال و فجرنا قد اشرف على البزوغ و الغد لنا"

وين ماشين ؟؟؟؟؟؟؟

توة تقريب جمعتين لتالي، تفاجئت كي قريت التدوينة هذي متاع الزبراط، و الي يتحدث فيها على مجموعة على الفايسبوك أخذت من كرة القدم التونسية مطية لنشر ثقافة عنصرية و غرس النعرات القبلية بين ابناء الوطن الواحد. لكن مما زاد اثار اشمئزازي هو وجود مجموعات اخرى ماعندها حتى علاقة بالكورة قاعدة تنشر في افكار لا يمكن وصفها الا بالعنصرية المقرفة!!

تنجمو تشوفو مثال لهنا لمجموعة تطالب بأن تكون ولاية بنزرت "بالفيزا" وذلك للحد من الهجرة الغير شرعية ل... مواطنين توانسة كيفهم !!

كيف كيف لهنا مثال اخر و هو حزب اليمين المتطرف ال... طبلبي، والي ينادي بوقف الاستيطان الي واقفة وراه جهات خطيرة كيما ال ك*جي*بي (كاف، جندوبة و باجة)

انا مافهمتش هالناس هذي تحكي بجدها و الا تفدلك ؟ على خاطر كان تفدلك فنعلمهم انو تفدليك ماسط لاسط و ينجم يوصل لنتايج لا تحمد عقباها... و كانهم يحكيو بجدهم... وقتها يا خيبة المسعى !!

مرة في الستاد عباد تزايد على بعضها في شنوة العقاب الي محضرو لاختو في حالة تعرس بواحد ساحلي... واحد يقول نضربها لاخر يقول نطيحلها فمها، لاخر يقول نقتلها... معنتها بهامة اثنين في واحد : منها يسمح لروحو باش يتدخل في مستقبل اختو، و منها يزيد عليها بهامة متاع عنصرية غبية...

اكا النهار ركبت مع تاكسيست في العقد الرابع من عمره، قعد يحكيلي كيفاش طلع معاه مره واحد اصيل الساحل، ياخي كي فاق بيه من لهجتو تعارك هو وياه و مبعد هبطو !! اي نعم طردو مالكرهبة على خاطرو ساحلي !!! والراجل يحكيلي فيها على اساس عمل بطولي يستحق كل التشجيع !!

حبيت نسوق المثالين هذوما باش نوري الي الحكاية فاتت حدود الفذلكة و المنافسة الرياضية و ولات تهدد الوحدة الوطنية. في الاخير نخليكم مع صورة لاحد النتائج الممكنة لاختبار في فايسبوك يحددلك من انا بلاصة في تونس انتي، و قولولي اش قولكم ؟

ماذا يحدث في إيران ؟

شكون كان يتصور الي احمدي نجاد بش يفوز فالدور الاول ؟ حتى حد !! جميع المحللين و المراقبين كانو يستناو في دور ثاني حاسم. لكن الي حدث كان عكس التوقعات، فكانت ولاية ثانية عوض دور ثاني. و كأنما كتب على دول العالم الثالث ان لا تعيش ديمقراطية حقيقية...

62.6% كانت النسبة الي نجح بيها احمدي نجاد، و هو ما خلى برشة ناس تشكك في نزاهة العملية الانتخابية، و اولهم المرشح مير حسين موسوي، و الي طالب بالغاء نتائج الانتخابات، كما شجع مؤيديه على الاحتجاج السلمي.

نعرف الي برشة بش يقولو نفس الحجة الي استعملها نجاد في المؤتمر الصحفي اليوم الصباح، و هي انو الخاسر ديما يلعب دور الضحية و يبدى يلوج على تبريرات على خسارتو. لكن اي متتبع للشأن الايراني يلاحظ بسهولة انو الدعوى بتزوير الانتخابات عندها هي زادة مبرراتها.

اكثر حاجة ظاهرة للعيان هي طريقة الانتخاب في حد ذاتها، و الي تتمثل في كتابة اسم المترشح على ورقة الانتخاب. و في حالة الي يكون فيها الناخب امّي، يقوم واحد من الحرس الثوري الموجودين في مركز الانتخاب بالعملية في بقعتو. و وقتلي نعرفو الي نسبة الامية في ايران حوالي 20% و الي الحرس الثوري يخدم تحت امرة المرشد الاعلى للثورة الاسلامية (الي عبر، ولو بصفة غير مباشرة، عن مساندتو لنجاد)، نفهمو الي امكانية التزوير ماهيش مستبعدة بالكل.

اضف الى ذلك انو في ايران ما فماش قوائم انتخابية : مجرد مضمون ولادة يعطيك الحق في الانتخاب. و بالتالي امكانية الانتخاب اكثر من مرة في اكثر من مكتب ممكنة.

من ناحية اخرى، تنتظر لجنة الانتخابات في العادة ثلاثة ايام قبل ما تمرر النتائج للمرشد الاعلى باش يصادق عليها. لكن الي صار في الانتخابات هذي انو السيد خامنئي وافق على النتائج فور صدورها، و هو ما يثير اكثر من سؤال حول مصداقية هذه النتائج.

هالتجاوزات الواضحة خلات مناصري موسوي يخرجو في مظاهرات عارمة ينددو فيها بنتائج الانتخابات، و بداو ينظمو في رواحهم عن طريق شبكة الانترنات، و هو ما خلى عمار الايراني يقصف مجموعة لا بأس بها من المواقع، و على رأسها موقع "تويتر". من ناحية اخرى، قامت السلطة بقطع خدمة الارساليات القصيرة في مرحلة اولى، ثم قطعت شبكة المحمول الاولى في ايران (والي تتحكم فيها الدولة) وما رجعوها كان اليوم الصباح.

الامر الجدير بالملاحظة في ايران، هي كونو كل ما يتعلق الامر بالاصلاح تاكل بعضها في البلاد، كيفما صار في المظاهرات الطلابية الي صارت سنة 1999 اثر صنصرة جريدة "سلام" ذات الاراء الاصلاحية. و الشي هذا يتفهم، على خاطر بعض الاصلاحيين يسعاو وراء الاطاحة بنظام ولاية الفقيه، و الي هو اساس الحكم الثيوقراطي في ايران. و بما انو 60% مالايرانيين عمرهم اقل من 28 عام، و بما انو كذلك ثلثي مرتادي الجامعات من النساء، انجمو نفهمو ان برنامج موسوي الاصلاحي هدفه بالاساس هو التعبئة الانتخابية ، لأنو السيد هذا كان في الماضي مالناس الي طالبت بقيام الحكم الديني و عمدت الى ارسائه.

و لهنا نفهمو تخوف النظام الايراني من المظاهرات الي قاعدة تصير هالنهارين، و الاشتباكات الي قاعدة تصير بين عناصر الامن و المتظاهرين.

شخصيا يظهرلي انو يجب ربط الاحداث هذي بإلِّي قاعد يصير في العالم من عشرين سنة لتالي، بمعنى رغبة الشعوب الي تعيش في انظمة قمعية في الانعتاق : هالشعوب الي عانت طويلا من جراء التقوقع و الانغلاق على جميع المستويات (الاقتصادي و السياسي و خاصة الفكري والثقافي).

و السؤال الذي يطرح نفسه في الوقت الحالي بالنسبة لي هو : هل ستصل رياح التغيير هذه الى البلدان العربية، على الاقل في مستوى التوجه الشعبي ؟

بالنسبة للصورة الثالثة : شاب ايراني يحمل ورقة مكتوب عليها : "كتبنا موسوي فقرؤوها نجاد"

حكايات الزمن المعفط

كيف كنت في الليسي كانت من عاداتنا في اخر السنة الدراسية انو نتلمو في القسم و نبداو نغنيو و نعملو شوية تصاور للذكرى..

وكنت في تلك السنة جبت معاي ڨيتارتي بش نزيدو نحفلو الجو..

انا بديت نعزف في المقاطع الاولى من الاغنية و ما نرى كان في وحدة من بنات كلاسي متحجبة جاية تجري و عليها علامات الفزع.. كي وصلت بحذايا بدات تحكي و تلهّج : "من فضلك.. احترم نفسك.. خبي العود متاعك.. يزي مالعزف.. ما في بالكش حرام؟!"

... ... ...

لحظة سكوت تتبعها قهقهات متعالية لاصدقائي...

قلتلها : "من فضلك انتي احترم نفسك... ظاهرلي ما عملتش حاجة تخالف القانون.. وكان يظهرلك العكس هاوينو الباب في اخر الكولوار عهدي بيهم غادي فين يتقبلو الشكايات... و على فكرة الالة هذي اسمها ڨيتارة موش عود.."

جاوبتني : "واش مدخل القانون ؟ ربي و الرسول قالو حرام معناها حرام !"

قلتلها : "ما فيبالكش الي داوود كان بيتهوڢن زمانو و كان عازف من طراز رفيع ؟"

هي : "استغفر الله... استغفر الله... كيفاش تفتري على نبي الله الكذب ؟ و كيفاش ما تقولش صلى الله عليه و سلم ؟"

انا فمة حاجة ياسر اتطيرهالي : الصلاة عالانبياء...

و كنت ديما في حصص التاريخ كي نقراو على تاريخ الاسلام تثور ثائرتي كي الاستاذ(ة) تقول صلى الله عليه و سلم بعد ذكر اسم "محمد" (وهذا قبل حتى اعلاني الالحاد)..

و كنت ديما ندخل في نقاشات مع الاستاذ(ة) نقول فيها انو من باب الامانة العلمية انو نتجردو من توجهاتنا الفكرية و ما نخليوهاش تأثر على المنهج العلمي (كنت كي غير قريت كتاب "في الشعر الجاهلي" لطه حسين" و مازلت متأثر بالعقلانية و التخمام الرزين متاع عميد الادب العربي..)

الحق النقاشات هذي كانت مثرية جدا و علمتني اداب الحوار و مقارعة الحجة بالحجة.. اذ انو في اغلب الاحيان النقاشات من النوع هذا توفى بطردي من القسم او تهديدي بصفر في الشفاهي... و في افضل الحالات يقلي الاستاذ " برى بدل الساعة بساعة اخرى".. وهي شفرة معروفة في معهدنا و تعني "يا سيد راك نفختهملي برة دز دورة و اعمل قهيوة و نمي قدراتك الحسابية من خلال طريح بيلوت.. و هاني بش نسترجل معاك و مانيش بش نقيدك مطرود في الدفتر"

نرجعو لعلالشنا... خلينا بنت كلاسي تلوم علي كيفاش ما نصليش على داوود... ما نجمتش نشد روحي و قلتلها : " تي انا ما صليتش لربي خلي عاد على داوود..."

عاودت سيبتلي سيري جديدة متاع "استغفر الله" و مبعد قالت : "احترم نفسك ! شنوة هالاستهزاء بالمعتقدات؟ تضحك؟ اتوة اتوة تشوف مبعد اش يصير فيك!!"

انا حاشاكم عندي مرض مزمن ما عندوش دواء : وسع البال... ومن اهم اعراض المرض هذا انو يخليك تحكي برشة و ما تبطلش النقاش حتى مع العباد الي ما تفهمكش، و نعرفو كلنا الي هذا يمثل خطر كبير على الانسان ينجم يوصل حتى لتنقيص الاعمار !!

استسلمت لامري و قعدت نفسرلها الي المقدس عند ناس ينجم يكون مدنس عند ناس اخرى و الي القيم تختلف من شخص لاخر... ما حبتش تفهم... قالتلك لا معناها لا... لا سبيل اليه... تنجم تكون مختلف معايا اما لازمك تحترمني... و الاحترام معناها انو ما تغنيش و ما تشطحش في حضرتي !!

قلتلها بكل صحة رقعة : "مالا عالفازة هاني بش نغني و نشطح و نعزف مالفوق و كان موش عاجبك قدم مطلب هجرة بحذى ال سعود متأكد الي غادي باش تلقى شكون يعطيك مكانتك الي تستحقها حسب سنة الله و رسوله"

ورجعت لڨيتارتي و جوّي و عدينا لحظات لا تنسى، وخليتها هي تموت بالغزول... للي فالاخر استسلمت و خرجت مالقاعة و هي تتمتم "استغفر الله... استغفر الله... استغفر الله....."

شكونو الي ناقص عقل ؟

اليوم ماكلة بعضها في البلوغوسفير على حكاية ناقصات عقل و دين : ناس تقول ما فماش فرق بين الراجل و المرا فيما يخص ملكة التفكير، و ناس تقول الي مخ الراجل و مخ المرا مختلفين على بعضهم في التركيبة، و بما انو النسا عندهم اقل خلايا في مخاخهم، فانو عقلهم بش يكون بالضرورة ناقص.

من خلال التدوينة هذي، نحب نبين انو النقاش في الموضوع هذا نقاش عبثي باتم معنى الكلمة، لانو موطن العقل في القرآن ماهوش المخ !!

تقلي كيفاش ؟ هاو جايك لحديث...

ورد في القرآن الايات التاليه

<<وَلَقَدْ ذَرَأْنَا لِجَهَنَّمَ كَثِيراً مِنَ الْجِنِّ وَالْأِنْسِ لَهُمْ قُلُوبٌ لا يَفْقَهُونَ بِهَا>>

<<"أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لا تَعْمَى الْأَبْصَارُ وَلَكِنْ تَعْمَى الْقُلُوبُ الَّتِي فِي الصُّدُورِ">>

اذا من الواضح ان موطن العقل في الاسلام هو القلب و ليس الدماغ!!!

مانيش بش ناقف عند تعارض القول هذا مع العلم الحديث، و بش نفترض جدلا انو العقل موجود في القلب.

يعني انو الي يجي يقلك النساء ناقصات عقل، "نورمالمون" يقصد الي النسا، حاشهم، عندهم حاجة ما هياش في قلوبهم ! لكن الواقع عكس ذلك، بمعنى انو المدافع عن هذا الحديث يولي يجبد في البحوث العلمية المتعلقة بالفرق بين دماغ الرجل و دماغ المرأة (يعطيه ياوالله بدماغ على راسو )

توة بجاه ربي هذا منطق !!! زعمة موش الرجال هوما الي ناقصين عقل، بما انو السيد الي عمل الدراسة هذي راجل، و زيد فرحان بيها و عامل فيديو عالفايسبوك ؟

ملخصهُ، الناس هذومة مستعدين بش يخفيو بعض جوانب الاسلام بدعوى الدفاع عن جوانب اخرى، وهو ما يدفعنا الى التساؤل عن مدى مصداقيتهم.

صدق بن كريشان اذ قال : "استيقظوا.. انهم يكذبون عليكم !!" ضُحكة الختام :

قال علي ابن أبي طالب:" إن العقل في القلب، والرحمة في الكبد، والرأفة في الطحال، والنَّفس في الرئة"

هل يمتلك الله الانسان ؟

هل يمتلك الله الانسان ؟ سيبدو لكم كلامي غريبا بعض الشيء، لكنه في الحقيقة لا يقل غرابة عن القول بان الله يملك الانسان.

ان الملكية حق من الحقوق. و الحقوق جاءت لتنظم العلاقات بين افراد ينتمون الى مجموعات. و بالتالي فالحديث عن حقوق يتمتع بها الاله يعني واحدة من الفرضيتين التاليتين :

الاولى هي ان الاله و الانسان ينتميان الى مجموعة واحدة اي متساويان في المنزلة و لذلك وجب علينا تقنين المعاملات بين الطرفين بتحديد حقوق و واجبات كل منهما، فيسقط القول بتقدس الاله و سموه عن الانسان

اما الفرضية الثانية فهي انه لا يوجد اله واحد بل الهة عديدة، فوجب اعطاء الله الاسلامي (او المسيحي، اليهودي... حسب السياق) حقوقا تميزه عن بقية الالهة.. و بالتالي يسقط القول بوحدانية الاله، و التي هي جوهر ديانات التوحيد.  

و هكذا يتبين لنا ان فكرة ملكية الاله للانسان تسقط بكل سهولة الاسس التي بنيت عليها جميع عقائد التوحيد. 

لكنني لن اتوقف عند هذا الحد، بل ساغوص اكثر في معنى الملكية.  

ان هذا الحق  الملكية بصفة عامة تنتج عنه منفعة، سواء كان ذلك بالاستعمال او الاستغلال او التصرف في المملوك. فلنفترض جدلا ان الله يتمتع، بطريقة ما او باخرى، بحق الملكية .فبمذا اذا ينتفع الله عندما يمتلك الانسان ؟ او بالاحرى، هل من المنطقي القول أنّ الله ينتفع من وجود الانسان ؟ الا يتعارض ذلك مع القول بان الله خلقنا لحكمة لا يعلمها الا هو، و القول بانه لا يريد منا من رزق و لا يريد ان نطعمه؟ 

خلاصة القول، ان القول بملكية الاله للانسان يتعارض مع ابسط اسس جميع ديانات التوحيد. فلم لا يكون الانسان ذاته هو الذي اخترع الاله ثم اعطاه حق امتلاك البشر و التصرف فيهم "على زي هواه" ؟ افلم يكن من الاجدر بنا القول بان الانسان هو الذي يمتلك الاله ؟ كيف لا ؟ وهو الوحيد الذي ينتفع من وجوده، سواء كان هذا النفع ماديا (مداخيل القنوات التلفزية الدينية، جمع التبرعات بطرق مشبوهة، توجيه المجتمعات الى نمط استهلاك معين) او معنويا (سيطرة على الرأي العام، فرض طريقة تفكير موحدة...) 

لكن الانسان كذلك يتمتع بالحق في التصرف في الاله، اي حق التخلص منه، او بعبارة الطف، الاستغناء عن خدماته :))

نحن خلقنا الاله و نحن نمتلكه، فان اردنا التخلي عنه تخلينا، فحياتنا من دونه بالتاكيد افضل !!

العدل الالهي في ذهن المتشدد الاسلامي

ليوم الصباح قمت مريض... راسي يوجع... حليت الشباك نلقى الدنيا باردة... بخلت عالمشية للفاك... قلت مالا نحل الفايسبوك كأيها الناس... منها نطير القلق و منها نطلع على احوال "الاصدقاء"...
حليت الصفحة الرئيسية و بديت انسنس عالشعب... ياخي نلقى فيديو مبوستينها ثلة من الطحانة حاشاكم و عنوانها
sob7an arbbi kifesh yinta9im mi jwiff
(هاو الرابط للي يحب يطلع)
توة لحكاية اصلا قديمة ياسر و عندها سنين ماللي صارت... اما الي كرزني بالحق هو هالنبرة متاع التشفي الموجودة في العنوان...
تي ازح... اذوما جماعة يشطحو في عرس و شايخين على رواحهم ياخي هبطت عليهم مصيبة قد السما...
و اذا يهود و اسرائيليين و صهاينة؟ ... ياخي ماهمش بشر ؟!
و كان تثبتو مليح اتوة تراو طفلة صغيرة عمرها قرابة ثلاثة سنين محملها بوها... اشنية ذنبها هي ؟؟ بأي ذنب قتلت؟
نعرف باش تقولولي " واطفال غزة نسيتهم؟؟ "
لا ما نسيتهمش... اما كل حاجة في بلاصتها...
الحزن على غزة لا يبرر باية حال من الاحوال التشفي في بشر اصابهم مكروه مهما كان...
و باش يقولولي الاسلام بريء منهم...
بالله شكون عندو الاسلام الصحيح يقُلّي ...
اتوة مليار و نص يقومو كل واحد يقُلّي "انا الصحيح"...
قالك "سبحان ربي كيفاش ينتقم ماليهود"...
اقعد مالا استنا انتقام ربك... اتوة هو يحرر فلسطين...
"سبحان ربي كيفاش ينتقم ماليهود"...
مَلّه رب و مَلّه هو !!
يعطيه الصحة !!
ما لقى في شكون ينتقم ؟
شبيه ما انتقمش من القواعد العسكرية الاسرائيلية ؟
اشبيه ما انتقمش من الاف الرؤوس النووية الي اسرائيل قاعدة تجمّل فيهم من عام خمسين؟
عباد توانسة في القرن 21 يخممو هكة... يعتبرو الكوارث عدل الهي... على الدنيا السلام... سلام؟ ... اي سلام؟ على الدنيا الهلاك !!
تذكرت حكاية... سنين لتالي... وقت الي جا التسونامي... إمام الجامع متاع حومتنا يخطب في صلاة الجمعة... قال الي ربي هو الي بعث الاعصار هاذا... على خاطر جنوب شرق اسيا فيها "الكفار الوثنيون" و كثر فيها البغاء... و الله ما كثر الا الغباء...
نرجع للفايسبوك... عدد "الاصدقاء" الي ينشرو فالفيديو في تزايد... زايد... الدم طلعلي لراسي... فديت... تخنقت... زدت مرضت... سكّرت لخرى و مشيت للفاك... قرايتي خير و ابقى من خرمكم يا طحانة...

السارح و المسروح به

فكرة الراعي فكرة قديمة نلقاوها في جميع الاديان السماوية. ففي كتاب المزامير يبدأ الاصحاح 23 بالجملة التالية "ادوناي راعيّ فلا يعوزني شيء". كيف كيف لحكاية تتعاود مع يسوع في انجيل يوحنا 11 " انا الراعي الصالح، و الراعي الصالح يبذل نفسه مكان الخراف". نلاحظ اذا ان المرور من اليهودية الى المسيحية، من العهد القديم الى العهد الجديد، اقترن بمرور صفة الراعي من ادوناي (الاله السماوي) الى يسوع (الاله الأرضي ان صح التعبير). الملفت للانتباه في المسيحية هو اعتبار يسوع لنفسه راعي الكوني الوحيد اذ يقول "و تكون رعية واحدة و راعي واحد" (انجيل يوحنا 10 16).


مباهي، تقولولي و احنا اش مدخلنا في هذا الكل؟
هاو جايكم لحديث :
ننتقلو توة للاسلام اذ نجد هذا الحديث "كلكم راع و كلكم مسؤول عن رعيته : الامام راع و مسؤول عن رعيته و الرجل راع في أهله و مسؤول عن رعيته و المرأة راعية في بيت زوجها و مسؤولة عن رعيتها و الخادم راع في مال سيده و مسؤول عن رعيته..." (البخاري : كتاب الجمعة : باب الجمعة في القرى و المدن)
مانيش باش نحكي على تضييق الحديث هذا لدور المرأة و الا حكاية الخادم و العبودية... الّي يهمني هو الجملة لوّلة : "كلكم راع و كلكم مسؤول عن رعيته". نلاحظو هنا الي صفة الراعي انتقلت بصفة كليّة للانسان و ماعادش منحصرة عند اله و الا ممثل الاله، فيبدو لنا من اول وهلة ان هذه العلاقة ولات افقية ماعادش عمودية. و من ناحية اخرى، نلقاو الي الانسان تحمل مسؤولية اكبر امام الاله بالمقارنة مع المسيحية او اليهودية. و هنا يكمن الخطر ! اي نعم، خطر !! علاش ؟ على خاطر بالطريقة هاذي يكثر التنسنيس و تتقلص حرية التعبير و ما جاورها... و هذا هو بالضبط الي صاير اليوم في المجتمعات الاسلامية. المسلم يحس روحو بمثابة رسول في عايلتو و في المجتمع الي يعيش فيه، لذلك تلقاه النهار و طولو و هو يأمر بال"معروف" و ينهى عال"منكر" و يصدر احكام تكفر كل من لا يتفق معه في الرأي. فهو بالتالي ينغّص العيشة عالناس الي دايرة بيه الكل حتى الي ماعندهمش اعتراضات على ارائه. هالنوع هذا كثر برشة هالايامات بفضل الثورة الرقمية : تلقاه كل مرة يبعثلك مايل ينسيك في الي قبلو : هاو مرة يلزمك كي تصلي تربع يديك ما تخليهمش محلولين، هاو مرة يقلك السواك خير برشة مالدونتيفريس على خاطرو سنة الرسول؛ و الرسول يحب عاد شكون يتبعو في كل شي الا في عدد النسا الي عرس بيهم ;)
مرة قلت لصاحبي المسلم يا اخي فك على قتلي و اخطاني مالحكايات هاذي ماو في بالك بي اعتزلت الاسلام من هاك العام. جاوبني قلّي ماذا بيّ ما نقلقش خويا اما الله غالب واجب ديني نتحاسب عليه نهار اخر... في المرحلة هاذي صحيح ماهوش قاعد يقلق في برشة، اما الامر يولي اكثر خطورة كي نهار مالنهارات يولي يحكي على حد الردة و ما تابعها... و ما تقولوليش راك تبالغ على خاطر صارتلي برشة مواقف مع ناس في عمري و حتى اصغر مني، و الي يعتبرو اقامة حدود الله هي الطريق الوحيد للخلاص !!
نرجعو توة لعلالشنا، نعرف الي برشة منكم باش يقولو : "حتى المسيحية و اليهودية فيها وصاية فكرية : ياخي مالا شنوة دور الرّبِّي و الببّاص؟" إصحيح ! و هذا بالضبط فين نحب نوصل ! سبينوزا كي نقد اليهودية توجه مباشرة الى رجال الدين، كيف كيف بالنسبة للفرينسيس في عصر الانوار. اما نقد الاسلام لشكون باش نوجهوه؟ صحيح المدعوذين ، مشكورين، قاعدين يقومو بدور كبير في تبهيم امّة محمد، و الي نقدهم باش ينقص من برشة خور. اما هاذا وحدو ما يكفيش. في ظل غياب مؤسسة دينية واضحة المعالم في الدين الاسلامي، فانو النقد يلزمو يتوجه للمسلم شخصيا، و ياخذ في عين الاعتبار تفاصيل واقعو و تاريخو، على خاطر المسلم يلعب في نفس الوقت دور السارح و المسروح بيه.
ما تنجم تصير نهضة في البلدان الاسلامية الا اذا كان مفهوم الوصاية الفكرية يتنحى من امخاخ لعباد الكل و لا عاد فمة لا سارح لا مسروح بيه : هذي هي المعركة الحقيقية.

!!!عيد ميلاد سعيد لمكشّخة

خبر غريب... اما قديم شوية

اليوم و انا قاعد نتجول عل الانترنيت طحت بالصدفة على مدونة للحزب الاجتماعي التحرري... ياخي... نلقاها... فارغة!!!
عمّار؟
لا
ايمالا شنوة؟؟
الموقع يا سيد(ت)ي بن(ت) سيدي تمت قرصنته!!
علاه؟؟
....!
....؟
....!!!
...
..؟!

عودة و مظاهرات في معهد بورقيبة النموذجي

هيا قلنا السلام عليكم... عندي برشة ما كتبتش في المدونة، من ناحية بسبب لقراية و من ناحية اخرى بسبب هالجوّ المشحون الي يميز تن بلوغز المدة لخرة، والي بفضلو تم تقسيم المدونين الى طوابير مرقمة من 1 الى 5... و نحب نعلن في هذا الاطار تكويني لطابور جديد يحمل رقم 1664 و الي شعارو "إذا كان الكلام من فضة فإن البيرة من ذهب"... نرجع لموضوع المدونة... انا شخصيا قطعت عهد على نفسي من هاك لعام باش ما عادش نشارك لا في مظاهرة لا في تظاهرة و لا وذني... اما برجولية يعطيهم الصحة اولاد (و بنات) المعهد لقديم متاعي في القريف الي عملوها... حتى مظاهرة يعملوها بفن

و رغم هذا و كلو، تقعد عندي تحفظات على التظاهرات هاذي و أهمها :
*التطويع الايديولوجي لحركات تلمذية عفوية : اذ انو الشعارات كانت من نوع " لا اله الا الله و الشهيد حبيب لله" او "خيبر خيبر يا يهود جيش محمد سيعود"...
*استغلال الظرف العام لتبرير الغيابات : بالله الي يحب يغيب يعطي لخوه اوبرمنش خمسة لاف (فرنك و الا بيرة... اما مالمستحسن بيرة) وينحي عليه مالرويق متاع قضية و ما قضية... نولّيوش نتعلمو في النفاق مالصغرة ;)